懷疑感染豬流感嘅遊客、維景酒店員工、的士司機等人，部份人今日就隔離期屆滿可以重獲自由，聽晚8點半鐘，灣仔維景會全面解封，亦意味香港今次抗疫成功，阻截豬流感社區爆發，今次應該飲得杯落，不過專家話唔好掉以輕心，消毒藥水要跟身。
變賣旅發局禮物包賺錢
解封日「D-Day」前夕，食衞局副局長梁卓偉噚日單人匹馬深入維景巡視，當局招呼唔到，搞到受影響旅客谷埋一肚氣，梁卓偉親自出馬安撫，同幾個南韓、日本、英國遊客傾過偈，據知略有成果，知道大部份人都想盡快離開香港，佢承諾盡量協助，但求大家唔好鬧政府就得。
維景旅客投訴當局安排不周，膳食差、唔衞生，知情人士話近日已有改善，家陣pizza、家鄉雞、麥記甚至鏞記燒鵝都有得食，而旅發局派嘅禮物包初時被人當係草，家則變成寶，越來越受歡迎，因為啲物品有價有市，有人將用唔着嘅八達通、入場券、優惠券轉手，真正坐享其成賺番筆外快；有個家庭用唔晒每人每日200蚊長途電話津貼要求折現，有成萬蚊落袋㗎，都幾和味，總之人人都想盡辦法攞盡政府畀嘅着數，一於擸得唔好嘥，抵償被隔離之苦。
墨西哥派包機接回國民，其他國家駐港領事都準備為隔離完嘅國民洗塵，招呼大家食家鄉菜以解思鄉之情，法國領事話會帶同鄉去食大餐，其他國家領事亦會派人迎接恢復自由身嘅國民，八方聽聞港府高層正在盤算如何迎接「D-Day」，為顯示香港已經免疫，可能會安排局長、旅發局高層去維景主持解封儀式，至於特首煲呔，據講暫時未有打算深入「疫區」。
03年世衞撤銷香港旅遊警告後，高官湧去老蘭攬女慶祝，又豪擲億元搞維港巨星匯冲喜，今次應該唔會咁大手筆，而且前車可鑑，相信高官亦唔敢再提議搞演唱會咁浮誇，之不過維景解封後仲要落閘徹底消毒，有一段時間做唔到生意，當局點都應該有啲表示，或者可以考慮搞個「維景巨星匯」，希望下次唔好又中招啦。
mailto:[email protected]