豬流感肆虐全球，令過往曾經歷過沙士嘅香港人，更加明白做好衞生防護措施嘅必要性。家陣唔單止好多公眾地方嘅清潔、消毒次數頻密咗，人同人之間嘅接觸亦都提高咗警覺，但喺每次出親街買嘢，畀錢嗰陣一定少不免會同陌生人有錢銀上嘅接觸，所以好多嘢真係想避都避唔到。但係就唔代表生意一定差，只係睇你點sell畀個客。
好似華華噚日聽到中銀香港分銷總經理龔楊恩慈話，見到家陣啲流感咁犀利，建議大家最好去有八達通收款服務嘅舖頭買嘢，然後嘟八達通畀錢，咁就雙方都可以減少接觸銀紙，自然就可以減低交叉傳染病菌啦，咁聽落日後有多個衞生又方便嘅消費結賬選擇，又真係唔錯喎！
少掂銀紙少感染
睇嚟最受惠嘅應該係中銀同八達通有限公司，第時多咗舖頭安裝八達通收款機，佢哋淨係收服務月費都夠開心啦！