財爺鬍鬚曾3月發表預算案前大事宣傳，喺電視、電台鋪天蓋地賣廣告，仲搵著名漫畫家李志清幫手，首次用漫畫形式諮詢市民意見，不過預算案出爐後劣評如潮，自由黨方剛質疑宣傳成效，要求當局交代嘥咗幾多錢。
民政局德成局長噚日以書面回覆，指預算案宣傳費總共使咗近74萬元，包括三萬本預算案諮詢漫畫製作費33萬元，10輯電視宣傳短片同12輯電台廣告，製作費要40萬元，短片喺電視播出6,000幾次，電台出街1,760次。
方剛同八方講，財爺聽咗咁多民意都冇接納，令人質疑諮詢誠意，「使咗咁多錢，唔啱聽嘅就當聽唔到，有啲浪費時間。」佢話如果只係假諮詢，下年應該慳番呢筆宣傳費。