恒生（011）大班柯清輝，噚日最後一次以副董事長兼行政總裁身份出席股東周年大會，從今日開始，柯大俠就榮休。噚日亦都係最多股東出席嘅一次股東會，足足開咗3層樓先夠用，就連一向沉默寡言嘅小股東，都忍唔住發言。
小股東話柯大俠應冧莊
有位忠實小股東問主席錢果豐，柯大俠要退休，但係見到報紙都將佢推崇到極點，喺柯大俠苦心經營下，帶領恒生股價走向170蚊，做得咁好都要退休，佢認為應該要「冧莊」先啱㗎，並反問家個班底會唔會唔夠硬淨㗎？錢主席非常肯定咁話「唔會」，又預祝新任行政總裁梁高美懿上任後會繼續幫銀行發展；佢仲話，由1933年以來，每位CEO（行政總裁）都為恒生作出好大貢獻，仲叫全場人士為柯大俠鼓掌㖭！
柯大俠全場笑到見牙唔見眼，不過股東會一完咗就急急腳走人，唔知係咪趕住慶祝正式退休呢？柯大俠由05年5月執掌恒生帥印後，確實帶領股價邁向170蚊，07年度純利亦創下新高；而飽受金融海嘯煎熬嘅08年，恒生業績只係跌22.7個巴仙，叻過唔少國際銀行。股東會完咗之後，錢主席話，畀柯大俠99分，唔比100分嘅原因，係因為佢從來唔會畀滿分，就算連自己都係得77分咋！
梁太已融入新家庭
梁太上個月22號已經喺恒生返工，一日三餐都喺總行博愛堂搞掂，所以好快融入呢個新嘅大家庭咁話。梁太聽到上一任CEO有成99分咁高分，就笑笑口話，希望自己做到99.5分啦，仲話要青出於藍都唔係咁易㗎，但佢會更加勤力去做。
李華華
mailto:[email protected]