《翻生侏羅館》未上前好多人唔太睇好！諗住玩埋啲「日頭平安，夜晚驚慌」嘅屎橋唔慌好睇；哈！點知真係俾賓史迪拿一條友救番，所以即將上映嘅續集都好多人實，既然刀仔作變成大製作，玩埋同期出Game都唔意外，到底你又能否好似呢位騎呢看更咁，扭盡六壬救番成班被捉嘅歷史人物老友呢？
文：陳福榮
大橋似戲加新元素
《翻生侏羅館2》遊戲版雖然名稱同套戲有啲分別，但其實都係講緊同一個古仔，玩家要控制堪稱史上最勁抽嘅看更拉利，喺全美最大資料庫「史密森尼學會」度救番班古董老友，如羅斯福蠟像、暴龍化石同羅馬大王等。
明明已經冇撈㗎啦！點解又要重操故業？基於呢班自然歷史博物館收藏品受到大裝修影響，全體由紐約被搬去華府，點知發生意外有塊力量無窮嘅黃金石板遭到偷走，世界大戰因而隨時爆發。為咗友情，拉利於是拎番佢最慣用嘅電筒同鎖匙，喺亂到飛起嘅另一間博物館，重演同歷史人物嘅戰鬥。
一味跟風諗計解謎
唔知係咪潮流興，《侏2》點都要塞啲《Bio》式解謎成份入去，說穿了即係行東搵鎖匙、行西開道門之類，當然過程中係有畀提示你。可能驚玩家眼大睇過龍，遊戲仲加入個「神眼」系統，嚟顯示各重要機關。成隻Game分為十幾關，包括聯邦陳年貨庫、國家空軍及外太空展館等，基本上要逐關解破，將黃金石板執番齊；玩家除可藉此開啟小遊戲、新關卡外，最正係可以開埋附加內容，如史密森尼學會嘅小知識，甚至畀你模擬喺間館度遊覽。
揸飛機縮水人樣樣齊
為咗同套戲睇齊，遊戲情節好多跟足電影版，例如拉利要借不同種類嘅館內設置當成移動工具，好似暴龍骸骨、登月太空船甚至由美國首名越洋女機師駕駛嘅螺旋槳飛機等，唔使完全只靠雙腿走。另外有啲狹小版面，需要改用羅馬大王等配角，等成班主角可以發揮友情力量。今次遊戲除出Xbox360版，畫質稍差嘅Wii都有份，遊戲內容亦大同小異；至於DS則變成純平面嘅橫向動作，玩起嚟當然唔係嗰回事啦！
Profile
機種：Xbox360、Wii、DS
廠商：Majesco
類型：ACT．AVG
人數：1人
