民建聯精挑細選第三屆政策副發言人，18個俊傑噚日同記者見面，最搶眼係由公民黨過檔、被封「新劉江華」嘅季霆剛。佢精於走位，一早攝咗中間靚位，擺好丁字腳pose，不時撥動MK型染髮等影相。
有共識唔評論六四
季霆剛自我介紹時，話對「新劉江華」呢個綽號感到光榮，因為劉江華唔止係黨副主席，仲係行會成員，會以劉江華做榜樣發憤向上，佢又同正版劉江華握手合照；劉江華則話民建聯一向用人唯才，咁講法，即係不問出身，歡迎其他俊傑轉軚加盟。
18羅漢有備而來見記者，季霆剛透露各人早有共識，就係唔會評論六四、7.1，至於佢會否參加7.1遊行，佢就快閃，「屆時可能唔喺香港。」提到被罷免嘅港大學生會會長陳一諤，阿季讚對方有勇氣，「可惜有勇無謀。」
負責保安事務嘅周浩鼎，表明任務係「針對社民連」，社民連毓民則叫自稱「鼎哥」嘅仁兄返去飲多啲中共奶水先獻世，「因為佢大佬都畀我窒到喊。」