政府發債，傳聞第二季會發行，細節未詳，左丁山始終唔明白發債之後有乜用，如果政府發債攞到二百億元，交畀外匯基金投資賺錢，本質上與政府成立一個對冲基金，冇乜分別。持有人比一啲對冲基金投資者好一啲，因為對冲基金如果輸得慘（如二○○八年），可能乜都冇晒，但特區政府嘅債務基金即使輸清，債券持有人仍可以自特區政府取回本金。
既然唔明，就要問人，呢日遇上財務教授K，就問呢個問題，佢平時口才便給，答左丁山就講晒「俄文」，與平時表現不符。後來其他人行開咗，教授K細細聲講：「你問中要害，我又係諗唔到。」哦，咁即係大家都以為特區政府為發債而發債，純粹係推動本地債券市場發展，相信又係得到一樣結果：泥牛入海。
既然教授K要再諗債券問題，不妨問吓佢有關大學研究吖。有大學教授罵本地大學學足美國，publishorperish，影響教學，連導師instructor都話要做研究。實情如何？教授K話：「按教資會意見，本港只有三間研究型綜合大學，即港大、中大、科大。但大學與大學校長有好大自主權，教資會不可能干涉干預，呢樣大學都好明白。但如果某間大學校長要加強研究工作，要教員多做研究，此乃大學之事，與教資會無關。如果有教授因而不滿，佢自己應向佢嘅校長反映，罵教資會有乜用吖。」做得大學校長，梗係想自己間大學學術聲譽提高啦，提升嘅標準就係在世界著名大學排名榜上排到前一百名、前五十名、前二十名……如何做得到？一個主要評級標準就係教員嘅學術研究論文之數量與質素。左丁山讀書時修讀一科研究方法（ResearchMethod），日本裔教授十分老實，佢話：「我已在美國經濟評論（AmericanEconomicReview）發表過兩篇論文，於願足矣，以後好難再寫到咁嘅論文，但在大學教書，唔寫論文又唔得，所以我現在專向一啲二線國際期刊投稿，至於何謂一級，何謂二線，經濟學界早有公論，唔使講到明嘞。」講到白啲，教授在AER發表論文數量多，大學嘅經濟學系排名就會高啲。日裔教授對我哋講：「呢行飯好難食，不過既然讀完博士，在大學搵到一份教職叫做生活穩定，唯有適應，諗方法應付，日日埋怨有研究壓力嘅話，不如辭職，到象牙塔外找生活。」