香港小朋友無論男女，對足球都有份狂熱，但香港足球給人印象不算亞洲頂尖，球員前景不樂觀，早排還發生打假波疑雲。其實香港小童足球正悄悄起革命，與日本浦和紅鑽交流、甚至Crossover巴塞隆拿，跟歐洲勁旅比賽，毫不輸蝕。大家在進步的同時，緊守快樂踢足球的宗旨，不但鍛煉技術，還包括健康心靈。
記者：林佩婷
攝影：王文忠、陳陶鈞
香港×巴塞 因一場8號波
足球水準之高人所共知，他們本身有專門足球學校培訓小孩，全球亦有十多間巴塞足球學校，將他們的獨特課程向外國推廣。上年6月，由傑志跟巴塞合作的香港巴塞足球學校在港誕生，學校市場部經理高志超說全因一場8號波。「07年請巴塞來港踢比賽，點知剛好8號風球，溝通後將比賽延遲一日。巴塞對我哋咁靈活應變好欣賞……於是後嚟有咗引入巴塞課程嘅想法。到08年5月舉行大型招募，免學費招收由97至02年出生的ABC組學員。」
西班牙賽露頭角
引入巴塞訓練模式，課程跟以往本土的有好多分別，不但小班教學，6歲小孩更可做到香港12歲的訓練，好似以往教後防大腳解圍，但課程就教佢哋控制個波再組織等。為令球員達最佳狀態，每月巴塞給予的訓練內容他們都全不改動直接教授，短短一年，就於上月獲邀到西班牙參加依比利盃青年錦標賽，跟羅馬、意大利等青訓勁旅比賽，勇奪第3名，令人鼓舞。「每3個月巴塞都會派人來監察進度，佢哋覺得學員好有潛質，推薦參加呢個比賽。雖然對羅馬輸7比1，但之前羅馬都係大掃對手十幾球，事後我哋被人狂讚有水準。」
香港×日本 快樂足球隊
還未到球場已傳來叫囂聲，然後見到日本J-League勁旅浦和紅鑽Heart-FullClub的教練被本地小童圍攏追趕，整整個半小時的交流，笑着進行，這就是他們所提倡的快樂足球。落合弘領隊說他們着重的非技巧而是「CreateHealthyMind」。「03年初成立時我們在日本不同學校教導，07年開始在亞洲巡迴交流，到過馬來西亞、韓國等，並非想搵國腳人才，而是希望提倡快樂踢足球，教練亦唔會太嚴肅。」難怪即使隊友交失波，大家依然笑笑口。
6月大招募
今年6至7月左右，香港巴塞足球學校將舉行大型招攬，選拔於95年及00至03年出生而對足球有興趣的學員，課程將由巴塞足球學校認可之傑志足球教練教授，費用全免。詳情可留意學校網址，會隨時更新。
查詢： http://www.fcbescola.hk