飛機降落啟德機場，謝志峰在機艙內失聲痛哭，身旁的記者安慰他，「到了香港，沒事了。」他的眼淚卻無法停下，「嗰一刻我唔係為咗自己嘅安危而喊，係為咗成件事件、成個民族，唔知未來發生咩事而喊。」
1989年，他任職亞視新聞部，一直被喻為6月4日凌晨最後撤出廣場的記者，把學生民眾和軍隊的所作所為，全看在眼裏。
他勸喻今時今日否定六四血腥鎮壓的「擦鞋仔」，不要為一時權力埋沒良心，歷史會還六四公道，到時候，他們會沒有顏面對子孫。 記者：張嘉雯
20年前的一事一物，謝志峰仍然非常清晰，廣場內的佈局，娃娃兵的衣着，每個細節，他都一清二楚。
6月3日晚上，他和亞視新聞部的同事揹着燈架和攝影機，一步一步踩着通花磚，爬上天安門廣場對開的公廁頂。那裏望到整個廣場，附近的馬路充斥着軍隊，不時看到火光，「當初儍吓儍吓，以為係訊號彈，後尾先知係子彈。」
「馬路好多傷者」
他們一直在那裏拍攝和透過長途電話做直播，直到凌晨4時，才開始撤退，「再唔走，我哋就陷入士兵當中，我哋影咗嘅嘢，都可能傳唔到返嚟。」無數在電視前看新聞報道的香港巿民聽着謝志峰說：「我哋冇辦法留落去，要走，唔係冇帶（錄影帶）返嚟，會盡辦法做報道。」
就在那時，廣場關燈，「我當時覺得好震撼，無論做任何嘢都唔應該熄燈，熄咗燈就冇人知道入面發生咩事。」黑暗中，他只聽到槍聲不斷。清晨返回廣場，場面很混亂，「見到啲學生走出嚟，軍隊夾住坦克，有啲人（學生）受槍傷，佢哋嘅精神係陷入咗歇斯底里嘅狀態，好驚恐。我當時諗唔到會發生咩事，希望唔好有恐怖嘅事發生，醫院好多傷患，馬路上好多傷者，外圍嘅遭遇戰最厲害，仲激烈過廣場附近。」
「最後一個撤離現場的記者」這個稱號他自言不敢當，他解釋撤走時長安大街及廣場各處仍有不少行家，只是大家不能做現場報道，惟有他的隊伍有手提電話，才讓觀眾有此錯覺。
不可以倒果為因
89民運，讓他深深感受到學生的愛國精神；運動由學生發起，工人、巿民、知識分子，甚至國家機關的辦事人員都相繼加入，及至每個層面、每個階級，足以證明民心所向，「我哋返嚟嗰陣過關，啲人問我有冇錄影帶，我話有，佢（海關人員）就叫我走。」
20年後，六四還沒有得到平反，反而似是而非的所謂「客觀」看法越來越多，有人指運動有外國勢力在背後推波助瀾，謝志峰平心靜氣說，「當時官倒橫行、通脹加劇、貪污嚴重，整個運動有社會基礎。（外國勢力）憑常理一定有，但呢個係簡樸嘅學生運動、愛國民主運動，呢個主體不能否認，碗飯周圍係有烏蠅，但你唔可以就話佢唔係飯。」
「本末應該搞番清楚，事實上社會出咗問題，人民追求民主，唔可以倒果為因，用有外國勢力介入嚟否定呢件事。唔係講緊良心嘅說話，我難以苟同。」對於有人批評在這場運動中，學運領袖爭權奪利，此後生活糜爛，謝志峰說：「人始終係人，有人性嘅弱點，嗰時嗰刻係良知嘅表現，表現出嚟係人性嘅光輝，係唔可以抹煞嘅。」
他沒有想過，事件發生20年後，仍得不到公道，「比我想像中慢，家啲人越來越長命。當年嘅學生散居外邊，都40、50歲，青春血汗、離鄉別井，幾多人喺監獄，幾多人喺裏面鬱鬱而終我哋唔知。佢哋嗰陣好辛苦考入北大、清華，生命光陰就咁冇咗，歷史上有能力嘅人應該還佢哋一個公道。」
要保留歷史證據
他明白要建制內的人說出真相是奢求，只希望有心人盡可能保留當時的歷史證據。他認為民主潮流不可抗拒，台灣二二八事件、文革都得到公論，「我覺得再過20年，相關利益人士唔喺度，可以有番個說法。」
對於那些當年慷慨激昂，今日否定六四的人，他如是說：「家嗰班擦鞋仔唔好埋沒良心，要有歷史智慧。呢件事遲早會有公道，到時佢哋唔知匿喺邊，點面對自己子孫？一時講唔到乜嘢咪唔好講囉，講啲同當初見到完全唔同嘅嘢，為咗一時嘅權同利，第日日子都幾難過。」
謝志峰的長女89年8月出生，他有跟她提及當年發生的事，「如果當時我嘅仔女喺學生入面，係佢哋嘅一分子，我會覺得係光榮，因為佢識得獨立思考，為公義、公平而咁勇敢，我會自豪。」
肺腑之言
籲行家勿因權勢埋沒良心
記者的筆是利器，一筆一劃，勾勒出歷史。20年過去，六四由「屠城」變「事件」，由「民運」到「春夏之交的政治風波」。仍在傳媒工作的謝志峰，沒有忘記當年廣場上的場面─一個年約六、七十歲的老頭兒，滿頭白髮，擠在學生當中，身上斜掛着布條，寫着「人民日報高級記者」，一方面支持學生，同時爭取機會說出真相。謝志峰奉勸同行不要因為權勢，埋沒良心，「唔好做得咁過份」。
「甘於貧支筆先會硬」
由亞視新聞部轉到港台，謝志峰始終為着公眾的知情權工作，對於有人指「六四屠城」一詞過於煽情、不準確，他說：「但係開槍係事實，坦克係事實，起碼死人係事實。」
「嗰班同學，數以百萬人走出嚟，純粹係中國知識分子嘅純潔表現，邊個會諗到為名為利？只係一腔熱血，中華民族嘅棟樑就咁無咗，有良心嘅人，應該要對得住天地。」
他直言記者要安貧，「家唔係話再講我就炒你、冇得撈，如果仲有說話嘅餘地，都應該慷慨成仁，從容就義……讀書人本來就兩袖清風，做呢行，一萬個得兩三個做老總、做社長，要甘於貧，支筆先會硬。」
他提醒同行不要因為權勢，埋沒良心，「除非人哋搵槍指住你個頭㗎啫，要記住你寫嘅就係歷史，會一路傳開去。」
今時今日，當年一起在前線採訪的行家，有些已晉身傳媒高層，他們旗下的機構，對六四有截然不同的說法，「真係唔好做得咁過份，大家出嚟食飯都好難堪，嗰時啲筆記我仲喺度，當年你唔係咁講㗎喎，啲義憤之言，大家仲可以對得返。」
新聞界與89民運相關的部份事件
89年5月21日 北京戒嚴翌日，本港《文匯報》社論開天窗，只書「痛心疾首」四字
89年6月5日 首批赴京採訪的記者回港，在機場受英雄式歡迎；《文匯報》報社外掛輓聯哀悼死難同胞
89年6月28日 亞視取得吾爾開希逃離中國後首次講話錄影帶，公司管理層要求把講話剪輯至7分鐘，經爭取後足本20多分鐘播放
89年6月底 《文匯報》出版特刊《血洗京華實錄》；該報社長李子誦因社論「開天窗」被新華社香港分社免職，該報30多名員工為支持李先後請辭
89年6月 《大公報》及《星島》分別出版特刊《歷史的見證：天安門廣場》及《北京學運：歷史的見證》
90年7月 無綫播出新聞部袁志偉獨家訪問李鵬，問題事先提交，引起爭議，袁並成為六四鎮壓後首名跟李鵬握手的記者
94年 亞視管理層禁止新聞部播放西班牙電視台拍攝的《八九天安門事件》，六名資深新聞工作者集體辭職，包括潘福炎、李玉蓮、盧永雄、徐佩瑩、劉國華及呂雲生，當時被稱為「亞視六君子」
資料來源：《人民不會忘記》、《蘋果》資料室