純睇近日港股升勢及氣氛，話牛市已經悄然殺到，相信散戶都唔會反對。
不過，唔少專門以數浪預測股市之「間尺派」信徒，對現階段港股是否進入牛市，認為言之尚早，並相信熊市未死。其實牛熊之爭十分無謂，不如揀隻靚股炒轉好過。
股海呢期並非豬流感肆虐，而係「熊流感」至真，事關呢輪熊證「打靶」率之高真係慘不忍睹。淡友經此一役後，元氣大傷，未知如何部署？星俠昨日在股場聽到有散戶話，恒指升抵「牛熊分界線」之250日線後，會掉頭跌到你唔信，大家又睇點呢？
破頂看0.65元
資金開始湧向二線股炒作，其中航天控股（031）連升4日，昨日再升3.1%，收市報0.50元。
航天上月中股價曾升至0.55元，其後出現調整，惟跌抵50日線即見V形急彈，昨日該股成交量激增至9180萬股，反映買盤大舉殺入，後市將再試衝前高位0.55元，短線目標0.65元。現價買入，以0.40元止蝕。
方星俠