五月一日，五月三日皆是賽馬日，因賽期太近，刨馬都刨唔切，加上四月三十日有豬流感一宗發生，唔多唔少都影響咗馬迷心理，故此馬場唔見得比平時熱鬧，單憑記憶，呢兩日嘅投注額與平時星期日賽事相比，下跌咗一啲㖭。每逢有長周末，香港人就往內地或外地旅行，相對而言，入馬場嘅意欲就冇咁強烈，左丁山以為賽馬日期如果刻意遷就公眾假期，未必一定達到預期嘅丁財兩旺效果。
四月三十日下午，財務W送來二千大元，囑代下注五月一日第五場二號「百威紀錄」獨贏及位置，財務W並非標準馬迷，去親馬場就係為咗社交應酬，下注甚小，頂多每次買兩百蚊位置。點解呢次咁重槌呢，追問之下，財務W話幕後人極有信心，與以前嘅口氣大大不同喎。財務W有命，左丁山不敢不從，次日到咗馬場代下注後，心思思，恐怕失去贏錢機會，於是跟風三百元。唉，後果如何，你哋知啦，食咗好過。
到咗第七場，血統專家/大馬主C話：「呢場十二隻馬，跑泥地千二米，夏佳理主席隻馬『聖河』大熱，點睇呀？」咦，夏主席坐在隔籬第三張枱，好似幾緊張噃，唔買唔得，醫生W話：「三號『哈哈妙』幕後人話新轉倉初出，叫我唔使買。」馬主C話：「唔，呢隻馬喺蔡神仙度已經榨乾榨淨啦，八十六倍馬，點會贏到呀。」資深馬主律師H話馬主C講得啱，於是大家搵「聖河」做膽拖幾隻半冷馬例如八號「全德勝」，六號「康威王」等。行過隔籬枱，馬主Y揸住張Y馬房貼士，第七場貼四隻馬，竟然有八號及三號在內，議員S話就買最冷嗰隻，三號「哈哈妙」，點知佢同朋友講咗買「哈哈抄」，朋友聽錯以為議員S叫買三號「哈哈餐」，於是各自下注。
結果呢？我哋班自認資深馬迷/血統專家統統輸晒，因為「聖河」跑第六，令夏主席頭擰擰也，好彩佢素來都唔下注自己嘅大熱馬嘅啫。議員S就笑到四萬咁口，因為「哈哈妙」跑第一，五百元獨贏投注收番四萬三千幾，佢嘅朋友食餐，中三號八號連贏，十蚊收六千八百幾，猛讚馬主Y啲Y馬房貼士奇準無比，大家於是爭住睇吓Y馬房嘅第七場貼士，不睇清楚猶可，一睇就暈晒，原來馬主Y拎錯張五月三號嘅賽馬貼士紙入馬場，五月一號嗰張漏咗響屋企！唯有嘆一句，議員S鴻運當頭，呢排千祈唔好同佢輸賭任何東西！