尊嚴何價？假波事件主角屯門普高，上個月場護級戰2:1贏淦源後，攞咗張「為尊嚴而戰」嘅橫額出球場，點知因為橫額未通過足總審批，被罰10萬港銀，總監任煒雄當時仲好口響話畀得起，點知面對足總判罰歷來最高罰款即刻轉口：「Nocomment！」唔好畀我求大俠估中，呢10萬到時咪要借會籍畀普高嘅貝鈞奇上身。
10萬罰款嚇窒任總
屯門普高上月10號對淦源嘅護級大戰贏波後，一眾職球員拉住張事前被足總ban過嘅橫額繞場，仲有就係停賽嘅普高門將周展宏、任總10歲大嘅囝囝都衝埋入場慶祝，球場變成無掩雞籠。
足總紀律小組前日裁決，指普高漠視足總決定，強行展示不獲批准嘅橫額及破壞球場秩序，呢啲嚴重行為不檢要罰款10萬。我求大俠打探到，足總對於行為不檢嘅最高罰款係20萬，但之前冇人試過，今次普高算係歷來最甘一次。除罰錢外，任總、普高總幹事蔡業輝都要停賽10場，而周展宏亦要坐6場波監。
網民搵到當日任總賽後話畀得起罰款嘅訪問，呢段喺youtube嘅片叫《「真」波吐「真」情》，任總講得都幾感人㗎。不過佢當時唔知要罰咁多，噚日搵任總回應有冇財政壓力、會唔會上訴，佢淨係識答：「Nocomment！」
普高莫財貝鈞奇上身
究竟普高夠唔夠錢畀罰款呢？一般嚟講，參賽球隊喺足總有戶口，用嚟扣除場租同比賽開支。聽講普高現時嘅足總戶口得番9萬蚊，仲未計足總盃同聯賽煞科戰；如果普高最後賴皮，睇怕將石硤尾會籍借畀普高參賽、假波事件後同普高劃清界線嘅足總副主席貝鈞奇，就要將10萬銀攬上身先攞得番個會籍喎。貝生回應話，今次事件喺足總立場嚟講，普高一定唔啱，但情理上可以原諒，仲話會同普高方面傾吓點收科。