波子997GT2同GT3威盡賽車界，好多車主不惜豪花200萬，都要一嘗GT3嘅魅力。自喻只愛賽車、唔要飛車嘅車迷Charlie，30萬平入一架BoxsterS，花15萬將架車扮到跟GT3九成相似，名副其實改頭兼換臉。
記者：徐影龍
攝影：譚盈傑
5萬全改車頭
Charlie搵到錢，不過買車有底線，一定唔超過50萬，拉利林寶唔會諗，好彩有朋友30萬平讓架PorscheBoxsterS畀佢，仲要係頂級版3.2L，滿足到Charlie揸超跑嘅心願，「其實BoxsterS個樣已經好靚，不過我本身鍾意997GT3多啲，但成兩球嘢，太離身喇，呢架BoxsterS實際好多，我寧願花幾萬蚊大改個車頭，始終我真係唔飆車，副偈幾勁都用唔着。呢架BoxsterS只係改咗一個月，最大工程係車頭，由頭燈、頭唇、鬼面罩、氣壩、沙板等，全部跟番GT3嚟改，連工包料都5萬蚊有找，齋睇車頭，基本上好難認得出係BoxsterS，對我嚟講真係慳番百幾萬，都叫做平平哋過到GT3嘅癮。」
現場睇，車頭同GT3真係有99%相似，連氣壩入口位、車冚前小欄柵都跟到足，但欠缺GT3字樣拉花始終爭咁啲嘢咁，「我純粹鍾意GT3個款先咁改，唔係為咗扮老虎嚇豬，拉花好簡單之嘛，不過唔想畀人感覺窮鬼充大頭，擺明呃人啫。」
翻新內櫳唔搞性能
揸得超跑，點會唔鍾意速度感？閒時梗有飆吓車啩？「真係連超速都無，我個人較為怕死，屋企啲車全部係歐洲貨，改吓Outlook已經好滿足，可以話為點虛榮而改，唔係為砌車而改。」睇番鮑魚同飛碟，真係全原裝，襯落4條三萬幾蚊嘅AdvanRacingRS19"軨度，顯得有點格格不入，真係飆車無理由制動系統唔搞搞佢。蕉中尾喉全部換晒，外表唔覺，原來Charlie貪圖佢把洪洪靚聲，萬幾蚊買嚟低沉排氣聲，以及多約20匹馬力，總算叫有點實際。
車櫳無大改但有大翻新，由於架BoxsterS屬01車，Charlie嫌座椅同內櫳有點老化舊態，索性將全黑櫳改為黑皮＋銀邊裝飾，再將座椅重新包過真皮，8年車感覺像全新一樣，總數都只係花咗四十零萬，生意人算盤敲得響喎，「點止呀，BoxsterS本身有電摺軟篷，再熱啲拆埋個硬頂，變成開篷版GT3，熟波子嘅途人見到肯定眼甘甘！」
997GT3
