大凌集團（211）被證監會勒令停牌已經五年，班小股東想走貨都走唔到，眼見復牌無期，卒之喺噚日連續第二年發起「五五遊行」，集合咗400幾人，先後遊行到證監會及港交所辦事處，仲去埋政府總部請願，希望有關方面畀公司盡快復牌買賣。
當中有一位印度「皇帝」首次出巡同行，佢無懼烈日當空，仲着住套靚靚「老西」抗爭，但佢此行並非為咗公司復牌後快手沽貨離場，反而希望趁機大手入貨㖭，點解？之唔係想揸重貨，反對公司發行可換股債券（CB），避免攤薄股東權益囉！
盼揸重貨 可反對發CB
呢位仁兄名叫RajaM.Daswani，「Raja」一詞喺印度解作「皇帝」，佢係家族裁縫事業嘅第三代掌舵人，家喺尖沙嘴開設洋服店，有好多海外媒體都訪問過佢。皇帝同華華講，自己幾年前用咗300幾萬港銀，以每股2.6仙大手買入大凌股份（停牌前報1.6仙），家仲揸住6個巴仙股權，當時只係覺得大凌現金多，股價又平，點知後來發覺間公司並冇為小股東着想，淨係打算想以低價發行CB益自己友，咁同搶劫（Rob）股東冇分別喎！佢仲話，寧願大凌供股，咁樣做，對大家都公平啲。
小股東話當買個教訓
事實上，有唔少大凌小股東好欷歔咁話，公司發CB，一己之力係阻止唔到，所以一切復牌為先，當買個教訓。之但係，家有Raja肯當白武士，加上證監會查案，為公司追討賠償，大家希望在明天啦！
李華華
mailto:[email protected]