里昂證券近排好多人事風波，繼今年1月有幾百名高級員工同意自願減薪後，集團旗下里昂證券亞太市場噚日宣佈，服務咗公司近十年嘅主席樂民信（RobMorrison）會喺6月30日退休，現任行政總裁（CEO）斯隆（JonathanSlone）將兼任主席。
接班人大有來頭
現年48歲嘅樂民信喺2000年1月加入里昂，02年獲晉升為CEO，到06年獲任命為主席，接替庫爾（GaryCoull）。
喺樂民信領導下，里昂成為全球最大嘅代理經紀行之一，但佢亦係哥本哈根氣候委員會嘅創始成員，自然想更專注從事氣候轉變同環保工作，佢亦希望花更多時間喺老家新西蘭過生活，於是辭去主席一職。
樂民信嘅接班人斯隆，大有來頭，佢曾經協助公司拓展美國同澳洲市場，同埋推出新業務BlocSec同SetClear。