杜琪峯和汪明荃曾傳出不和，雖然上月阿姐高調參加阿杜的生日會泯恩仇，但前晚阿杜、甘國亮和黃秋生到銅鑼灣出席首映禮時，阿杜對阿姐和羅家英結束20年愛情長跑竟然揶揄說：「恭喜佢，唔係呢個，仲有邊個可以揀。佢啲嘢好神秘，佢喺生日會冇同我講呢啲，我咁多口，梗係唔會同我講，聽到佢哋結婚消息都覺得好細個，不過都開心，家英哥好就得阿姐。」
甘國亮贈《獅吼記》
與阿姐十分老友的甘國亮對兩人結婚消息大感愕然，他笑言早前阿姐舉行的舞台劇，家英哥攞晒彩，所以他叮囑家英哥要好好愛錫阿姐，甘國亮又笑說：「我哋咁好朋友，梗係要搵值得紀念嘅禮物，真係好難諗，都幾十歲人乜都有，或者送個劇本佢囉，阿姐喺家英哥面前好小鳥依人，所以送個《獅吼記》畀佢。」至於黃秋生初頭得知阿姐結婚消息時大感懷疑，並說：「拉斯維加斯唔係去玩咩，喺嗰度結婚唔使分身家。」
此外，粵劇名伶阮兆輝昨日在黃大仙出席活動時表示後日會託朋友帶備賀卡給阿姐，原本他想親自觀禮，但最後因太忙而不成行。同場的出爐影后鮑起靜就大讚阿姐好人，當日其父鮑方過世時，阿姐更擔任其父的治喪委員會成員，她大讚兩人是天造地設的一對。
採訪：何慧斯
攝影：黃偉雄、陳俊強