各位隔離喺灣仔維景酒店嘅同胞，口尋日我用兩文三語同你哋講嘢，解釋點解要困住你哋，我講英文"apologies"道歉，不過講普通話同廣東話時，只係叫大家忍耐同諒解，並冇道歉或講對唔住。有人指我大細超，學才子陶傑玩歧視，對住洋人saysorry，卻不對自己人講抱歉。
大家要明白，我乃係一名番書仔，自細讀英中，飲殖民地政府奶水大，而且係英女皇冊封嘅爵士，英語至係我mothertongue，普通話水平非常普通，廣東話亦不流利，連狗噏都未聽過，又點會同大家鬥噏對唔住？
本人幼受庭訓，歉不可以亂道，中國領導人更不能立亂道歉。20年前有人講咗句「我們來得太晚了，對不起同學們了。」咁就賴嘢！因此，好sorry，我真係唔可以貿貿然講對不起。道歉係一門藝術，倪震同陳冠希嘅道歉聲明，我參詳多次，覺得值得學習，所以今次我採用「陳冠希式」道歉，即係只用英文講apology。
至於其他局長，日後不排除以倪才子方式問責，犯錯後為了令公眾安心，為了顯示後悔和承擔，要第一時間引咎分手……sorry，應該係下台先啱，因為我明白到在大家的心目中，犯錯局長不再是個稱職的官員，這無疑是極大的損失，但我相信傳媒界會歡迎這個痛苦的決定。
實情我唔係唔識得道歉，前年10月我上香港電台發噏風，話文革係極端民主，後來知衰，即時表示抱歉收回言論，好似狗噏咁，當自己冇講過囉。舊年委任副局長、政治助理，點知班友未返工就爆出有人攞外國護照，查實邊個香港人冇太平門吖，不過你哋大驚小怪，我惟有就安排失當而道歉啦。
既然我曉得道歉，點解今次又咁孤寒呢？呢種就係有中國特色嘅道歉文化，若果我唔向香港人道歉，班友7.1又上街；你哋班遊客就唔同，幾日後個個雞咁腳走人，呢聲對唔住，梗係慳番啦。最後，我要補充，由於我唔想講「對唔住」，所以呢篇嘢都係請槍，我由始至終冇向大家道歉，sorry。
曾蔭權
〈李八方代行〉
mailto:[email protected]