呢排城中熱話，莫過於掀出載過墨西哥客嘅A、B的士司機，勾線、重案組、攔車乜都齊，當正捉葉繼歡咁大陣仗。我哋班行家當然唔反對，始終同全港市民切身有關，緊張啲係啱嘅。好多熟客都問我知唔知「隱形炸彈」匿喺邊，我就真係唔知，不過聽隔籬台大麻成亂吹水，話條友一早蒲咗面，好多商會幹事知係邊個，不過想保護番個司機，又或借啲意擺吓商會做到嘢嘅姿態，傾掂數先再交條友出嚟啫。嘩，乜講到似層層，真係亂噏無風濕，又保護又講數，你估拍《無間道之的士風雲》咩，大麻成都係眾多自吹自擂嘅司機之一，用吓個腦都知無可能啦，好彩到家陣總算搵到嗰位司機，更好彩係初步檢查未有感染迹象，的士事件總算告一段落。
文：黃師傅