粵劇紅伶林家聲的太太紅荳子，因癌細胞擴散至心臟，昨早病逝於加拿大多倫多，享年75歲，彌留時丈夫聲哥、兒媳陪伴在側。紅荳子原名魏筱靈，她14年前患上淋巴癌，昨日終不敵癌魔與世長辭。
昨日記者致電在港的林家聲徒弟蓋鳴暉，她說：「今日朝早10點幾，有電話打嚟話師母過咗身，嚇我一跳，因為幾日前我打過電話畀師母，佢把聲好弱，我知佢身體唔好，情況唔係咁樂觀，佢話會入醫院檢查，估唔到咁快去咗。」蓋鳴暉現在最擔心師父聲哥，她續說：「師父好平靜，咁內心一定好傷心，老來少咗個老伴，我打畀佢，佢話：『我撐得住，我冇事，你哋唔好擔心我，要畀啲心機做戲。』」蓋鳴暉覺得師母已病了十多年，一直做化療十分辛苦，令人甚為心痛又難過，如今算是一種解脫。蓋鳴暉稱完成手上工作，希望盡快趕去加國奔喪。
八和成員致哀
昨日八和會館成員出席在大埔亞視舉行的活動，其中譚倩紅說：「我哋以前有十大姐之稱，我睇住佢哋拍拖同結婚，一路知荳姐身體有病，佢為咗頭家堅持落去。」另外，陳劍聲、梁漢威及甘國衛也同聲表示十分擔心聲哥，希望他保重。
紅荳子是紅線女的徒弟，藝名由馬師曾代擬，早於50年代已跟林家聲結台緣，日久生情。二人62年結婚，育有兒子潤笙、潤添。林家聲93年退出藝壇，與紅荳子移居加國。惜幼子潤添於03年9月燒炭自殺，紅荳子哭斷腸，兩年後長子潤笙結婚，令聲哥夫婦老懷大慰。