前財爺阿松辭職後韜光養晦，早前應明天更好基金邀請訪美，當然係唱好香港啦。佢話身處紐約時，當地有學校爆發豬流感停課，墨西哥疫情亦越嚟越嚴重，但佢卻唔擔心；八方見佢噚日不時咳嗽，恐防佢係隱形帶菌者，佢強調只係俾記者問到氣咳。
正職做「摩登二五仔」
金融海嘯加埋疫症，家陣香港形勢好似03年翻版，阿松不在其位，坦言感覺輕鬆好多，對官府舊同事備受壓力「寄予無限同情」。阿松話目前正職係「摩登二五仔」，「即係星期二飛出去，星期五飛返嚟。」
另一沙士後落台嘅高官楊永強噚日現身公開活動時，堅持封口唔評論豬流感疫情；曾染沙士嘅醫管局前高層何兆煒以噩夢重臨形容呢次疫情，佢認為港府今次應付疫症措施恰當，因為甲型H1N1係新病毒，從嚴處理無可厚非，相信衞生署封酒店、執行隔離令前，已經同世衞溝通過。
香港暫時似乎冇受豬流感大舉侵襲，何兆煒話六年前沙士經驗，令香港上咗寶貴一課，幾年嚟推行嘅改善措施，亦冇白費心機。