正式殺到埋身嘅豬流感近日成為全球焦點，本港市民齊心抗疫之際，娛樂圈都人人自危，首當其衝就係人煙密集嘅紅館演唱會。四年冇開個唱嘅林子祥（Lam）噚日喺尖沙嘴舉行記者會，宣佈下月5號同6號舉行兩場演唱會。
阿Lam勇字當頭，唔怕疫情埋身，佢聲言到時會同觀眾零距離接觸，仲話相信會幾好玩，埋身都冇問題。問阿Lam有冇減少同太太葉蒨文咀嘴？佢話：「佢嗰啲『妹妹妹妹』冇問題。」
阿Lam喺個唱中會大唱快歌，仲請咗24名舞蹈員伴舞，嘉賓方面有張敬軒同側田。由於阿Lam曾經喺紅館演出時喺機關高處墮下，所以佢最初計劃將舞台設計到貼實地面，但遲遲唔批，最後改動為升高台面，阿Lam話：「肯定冇機會可以跌，嗰次係意外，家隻右耳都未好過，但我習慣晒。」
五月天派口罩
此外，台灣樂隊五月天喺本月20、21同22號舉行三場紅館演唱會，佢哋每場預備咗3萬個口罩派畀觀眾，五月天發言人話：「截至目前為止，主辦單位仍決定照常舉行，若疫情嚴重要取消，或有需要在場外體溫檢測，這些我們也會配合，而且近日已要求五月天多吃補品增強抵抗力，更要求他們乘飛機要戴口罩。」