荃情報喜之傾城之戀－－阿姐汪明荃與羅家英細水長流的感情，終於開花結果，二人已於拉斯維加斯註冊結婚。由於突傳婚訊，不少圈中好友大感愕然之餘也送上衷心祝福，其中包括81年與阿姐譜戀曲的何守信。雖然二人經歷感情荊棘，85年戀情告終，自此斷絕來往，昨日何守信得悉阿姐婚訊，大方恭賀阿姐說：「恭喜！恭喜！任何一個朋友結婚都係好事。」 採訪、攝影：丁寧、卓寶花
苗僑偉（三哥）：
恭喜佢哋，有情人終成眷屬，大家一早已當佢哋係兩公婆，只係家正式有個名份，我代表埋三嫂祝佢哋早生貴子，趁後生生嘛。
陳慧琳：
我恭祝家英哥求婚成功，我同阿姐合唱嗰首《自由女神》家可以變倉底貨。我哋呢啲無自由，失自由嘅人要搵過第二首歌唱啦。
黃宗澤：
黃宗澤：簡直係天大喜訊，冇諗過佢哋會結婚，不過佢哋sweet，又happy，家英哥拍戲好搞笑，不過私下唔講笑話，我諗阿姐好小鳥依人，始終女人有溫柔一面。
胡杏兒：
好爆喎，好驚喜呀，佢哋兩個一向好好，關係好似夫婦咁好，估唔到家英哥將野蠻奶奶融化咗，阿姐拍劇時候家英哥都有嚟探班，佢哋見面時好sweet，會攬攬抱抱咁好開心，我仲以為奶奶唔會結婚，可能佢做完舞台劇了咗心願，相信阿姐都冇乜所求，都想正式有名份搵個伴。
關菊英：
好驚喜，有情人終成眷屬，同阿姐都熟，間中都會食飯，但就冇聽過佢哋籌備結婚，我仲未諗送乜禮物畀佢哋，要送啲有意義嘢。
米雪：
阿姐好柔情，家英哥好好嘢，可以感動到阿姐，平時我哋一齊食飯，見佢哋好有默契，好戥佢哋開心，平時見阿姐好開心，好甜，又試過一齊煮飯，阿姐會餵家英哥食，家英哥又會得阿姐好開心。
張國強：
美國咁危險佢都去，不入虎穴，焉得虎子。好難得搵到遷就大家嘅人，阿姐半年前拍劇曾經講要整整個愛巢，所以早有先兆，等佢哋返嚟會同佢哋慶祝，睇家英哥入幾多球，即係生幾多貴子。
曾華倩：
恭喜晒佢哋，我哋至八會同阿姐傾過電話，我仲講笑問阿姐你係咪有咗大肚先結婚，搞到阿姐笑到鬼咁開心，點都好係一件開心事，佢哋兩個真係好夾，咪以為阿姐好惡，佢對家英哥好溫柔㗎。
鄧梓峰：
今日聽到阿姐同家英哥嘅喜訊，我立即都同圈中一班高爾夫球波友分享，大家都戥佢哋高興。希望佢年生貴子，不過我指嘅子係好想佢哋可以為粵劇界培育多啲接班人，等呢個國粹可以好好傳落去。
薛家燕：
嘩！真係好開心，我有睇過佢哋個舞台劇，其中一幕係求婚，我仲心諗佢哋唔知會唔會真係結婚，或者呢個舞台劇令阿姐心動，咁就去結婚，家英哥對阿姐好好，難得大家搵個咁夾嘅伴。
肥媽瑪利亞：
恭喜佢哋，應該啦，佢哋相處咁耐，只係欠一張婚紙。講到夫妻相處之道，佢哋叻過任何人，要做家英哥女友唔易，做阿姐男友都同樣唔易，因為佢哋都有一定成就同地位，又經歷過病、是非等高低起跌，相信佢地會幸福快樂。
賭城註冊簡單快捷
阿姐和家英哥結婚地賭城拉斯維加斯，除了是藝人「賭番兩手」的地方外，也是註冊結婚的勝地。
邵逸夫、方逸華
簡介：六叔於97年5月6日在賭城註冊結婚，給相識45年的方逸華一個名份，兩夫婦恩愛如昔。
謝偉俊、白韻琴
簡介：兩人於97年秘密在拉斯維加斯結婚，雖然早前婚姻曾亮起紅燈，但最後仍化險為夷。
呂良偉、周海媚
簡介：85年合演《小島風雲》撻着，二人結伴到賭城遊埠，由牧師作證下「結婚」，但並無真正官方註冊登記，後來戀情無疾而終。
資料來源：《蘋果》資料室
無綫花旦 情路迂迴
汪明荃與羅家英有情人終成眷屬，至於昔日無綫花旦黃淑儀、趙雅芝、李司棋和鄭裕玲，今日又情歸何處？
黃淑儀（59歲）
當年只得19歲便嫁給比她年長20多年的劉芳剛，誕下一對子女，惜婚姻只維持7年。81年跟讀醫的徐景清結婚，二人再育有兩子。
趙雅芝（54歲）
70年代曾嫁給醫生黃漢偉，離婚後與黃錦燊相戀，84年結婚，恩愛至今不渝。
李司棋（58歲）
曾有兩段婚姻，71年與法醫官葉志鵬結婚，育有一女葉子青，但89年因發現丈夫有第三者而離婚。92年與製衣商人何偉強結婚，99年離婚。
鄭裕玲（51歲）
與甘國亮拍拖10年後分手，92年開始與呂方交往，去年呂方與嘟嘟提出分手，結束16年情。
資料來源：《蘋果》資料室
相士話：結婚雙贏夫妻互旺
汪明荃（阿姐）和羅家英相愛20年，二人有情人終成眷屬，本月2日在美國拉斯維加斯註冊，正式結為夫婦。堪輿家麥玲玲指肖豬的阿姐和肖狗的羅家英命格很夾，二人結婚可互旺運程，她昨日在電話中說：「家英哥今年犯太歲，佢結婚可以冲喜，一喜擋三災，今年對佢財運仲好有幫助，正好搵多啲錢畀阿姐做家用。」阿姐今年的運程都適合結婚，麥玲玲說：「阿姐今年驛馬星動，喺外國結婚真係最啱。」另一堪輿家李丞責表示阿姐和家英哥五行都屬土，他昨日說：「佢哋係秋收嘅土，兩個人性格都肯付出，結婚好夾。佢哋五行同樣需要火，所以着紅色衫好有理。」
採訪：丁寧