銅鑼灣必定係繼旺角後，搵位泊車難過登天嘅另一區。錶位唔多覺，但就通街都泊滿車。早排樂壇細孖日本斷正，黎老闆都告誡過大家：「違例泊車要抄牌！」唔想學細孖咁搞到俾人「停牌」，就睇睇〈轆Book〉調查員Leon介紹四個各有賣點嘅停車場啦，最方便最平定最慳任揀。
記者：許維雅
攝影：陳陶鈞
四粒鐘最抵
禮頓中心
入口：霎東街
出口：勿地臣街
泊車需時：3分35秒
今次嘅調查以Sogo為中心點，搵銅鑼灣中心地帶附近嘅至掂停車場，經實地比較，最筍嘅要算離Sogo10分鐘步程嘅禮頓中心，鄰近時代廣場都叫就腳啦。收費四個鐘為一單位，公眾假期都係$60，平均$15一個鐘，即使唔喺商場消費都好抵，但一定要泊三個鐘以上先抵，否則收$22一個鐘。缺點係出入停車場就有一條勁窄嘅迴旋斜路，轉足兩個半圈先到，指示也不太清晰。另一問題係勿地臣街出口勁多車，新手想出車走有一定難度。
醒你：唔收現金，只接受電子繳費、八達通，記住入定錢。
收費：$22/1hr（任何時段）
泊車優惠：星期一至五：$45/4hr（11:00am-12:00nm）或購物滿$500免費三小時。
星期六、日及公眾假期：$60/4hr（11:00am-12:00nm）或購物滿$800免費三小時。
（消費商場包括：禮頓中心、希慎道壹號及利舞台）
查詢：28908845
最方便快捷
世貿中心
入口/出口：告士打道
泊車需時：1分50秒
將車駛落一條短斜坡就已經到達停車場，車位同路都夠晒闊，新手都無有怕。停車場有三個出口，一層樓梯已經到地面，行幾步就到Sogo，極之方便。另外有一部上商場，一個出口去炮台，美中不足就係等較耐，樓底亦較矮，七人車或Jeep要小心，而且有好多位都唔泊得。
醒你：較低一層嘅B2停車場無，有老人家會較不便。
收費：$25/1hr（星期一至四）；$35/1hr（星期五、六、日及公眾假期）
泊車優惠：星期一至四：購物滿$300免費一小時，滿$500免費兩小時。星期五、六、日及公眾假期：購物滿$500免費一小時，滿$800免費兩小時。
查詢：25764121
全天候收費
伊利莎伯大廈
入口/出口：告士打道
泊車需時：3分20秒
全天候劃一收費半小時$11，車主唔使下下望錶攞車。三層停車場有180個車位，樓層係一開二嘅半層形式設計，令停車場柱位比較多，樓層間雙線上落，中間更有石柱將行車線隔開，令上斜位勁窄，長身大車都要偷位轉彎，否則好易中招，所以泊車時間都要耐啲。
醒你：商場只有一部通往停車場，要行到最入最遠先見到，記住預時間預錢攞車，因為不接受電子繳費。
收費：$11/半小時（任何時段）
日泊：$80（星期一至五：7:30am-6:30pm）
查詢：25754121
最易免費泊
時代廣場
入口：霎東街
出口：羅素街
泊車需時：2分40秒
車輛流量頗大，絕對可以用最大、最新、最嚴保安來形容。行車線及車位十分寬敞，地面有清晰路向指示，唯一不便係出口只得一個，泊遠啲都有排行，加埋等都算耐，假日更唔可以直接搭上商場，都幾麻煩。不過只要消費$200就可以慳番三個鐘泊車，咁容易可以免費，慢慢行都得啦。
醒你：商場多個地方都有電子繳費機，收現金就只得B4一層，等已經耐，仲要等兩次就真係避之則吉。
收費：$27/1hr（星期一至五/12:00nn-10:00pm）、$22/1hr（10:00pm-12:00nn）；$29/1hr（星期六、日及公眾假期）
泊車優惠：星期一至五：購物滿$200免費三小時。
星期六、日及公眾假期：購物滿$200免費兩小時。
（消費須以一張發票計算）
查詢：21186911
醒泊貼士
1.最平大誤會
好多人都話禮頓中心對面嘅嘉柏停車場抵，$12一個鐘，仲掛晒巨型海報宣傳。點知原來第一次必須要泊兩個鐘，收你$48，然後先送張優惠券畀你，等你下次泊兩個鐘時就免費送一個鐘畀你，唔明？唔緊要，一句講晒：「搵笨！」
2.錶位唔使諗
四個筍場都未夠平？咁就要畀啲腳力。銅鑼灣中心地段一個錶位都無，最近都要過咗鵝頸橋，或者維園近天后嗰邊。謝斐道過咗鵝頸橋一段有少量半小時及兩小時錶位，但等到有位嘅機會極之微。
3.泊大坑慢慢玩
再想慳的話，大家不妨去遠少少，大坑有大量兩小時錶位之餘，更有爛地停車場，星期六、日及公眾假期都係$12一個鐘，行出市中心只係約十分鐘多啲，點玩都無後顧之憂。爛地停車場入口喺重士街，十分易搵。
