隨住紐卡素、米杜士堡同新特蘭呢周相繼輸波，睇怕呢3支東北球隊入面，總有兩隊會陪榜尾西布朗下季一齊降落英冠。有謂「弱隊出龍門」，我求大俠睇勻3支東北隊都應驗唔到呢個理論，只係成日睇到夏柏、巴利鍾斯同富洛普個個變晒紙板公仔咁，任人射破大門，真係陰公……
夏柏唔差但紐記太屎
紐卡素喺1月轉會限期前賣走1號門將基雲，諗住夏柏終於守得雲開，點知都係要面臨降班危機。夏柏93年經已轉會到紐記，將接近20年嘅青春奉獻晒畀「喜鵲」，不過球隊一日有基雲，夏柏都只能夠呆坐冷板。期間夏柏係咁被球隊外借，做足10幾年「基雲影子」。
好嘞，1月尾基雲過檔曼城，夏柏等咗咁耐終於「紮棍」成為首席門將，點知紐卡素今季越踢越沉，周日輸埋0:3畀利物浦，家陣續排尾3。計我求大俠話，就算夏柏點神勇，當球隊場場輸波，又有邊個球迷記得夏柏？
英超東北隊今季都係黑㗎喇，嗰邊米堡又係踢到成pet屎咁，唔識入波之餘，防線又係任人魚肉。
多年正選龍門舒華沙轉咗去富咸之後，米堡試過用端布爾，近期就用番巴利鍾斯把關。領隊修夫基唔好以為巴利鍾斯都係澳洲仔，就可以做到舒華沙接班人先得㗎，根本完全差幾皮！不過，中堅賀夫同韋達幫唔到手就真嘅，巴利鍾斯自然失波多。
黑貓計縮數唔用哥頓
新特蘭嗰邊積分上都叫安全啲，有35分排緊16位，但係球會政策上就好似有啲狗，我求大俠八到國腳級門將哥頓傷完復出好耐，不過都係打唔番正選，何解？
英格蘭傳媒就講笑話「黑貓」唔出哥頓，係因為佢07年由赫斯加盟嗰陣，合約寫明如果代表新特蘭上陣夠50場，就要額外支付多33萬鎊畀赫斯。家陣哥頓累積計已踢咗49場，新特蘭費事科水，焗住要用成日甩漏嘅富洛普頂替，假如「黑貓」最後降班都抵死啦！