香港四大船王中包玉剛、董浩雲、趙從衍已不在人世，健在嘅只有曹文錦，自從佢創立嘅萬邦集團喺02年撤銷上市地位，已經好難見到佢。噚日理大「萬邦曹文錦海事圖書館暨研究及發展中心」開幕，捐咗成千萬嘅曹文錦，由阿仔──萬邦主席曹慰德陪住到場，仲有世姪捧場，就係董浩雲長子、前特首董建華。董伯伯做特首時係萬人之上，佢噚日見Uncle，當堂變咗乖巧嘅晚輩。
呢位低調船王現年84歲，精神奕奕兼笑容滿臉。佢識講5種語言，除咗母語上海話，英文同普通話都流利，日文亦唔錯，廣東話就麻麻哋，佢話喺香港住咗成60年，都係唔多識講。
曾出口打救世姪
船王話，金融海嘯對航運嘅打擊，比80年代航運業低潮嘅仲大，因為金融海嘯係全球性，影響好深，有幾深就好難估，好在萬邦經歷過低潮後，營運都好小心，今次集團都有裁員但唔多。
講到80年代航運業低潮，相信董伯伯印象更深，東方海外（316）當年幾乎破產，好彩有霍英東代表阿爺出手相救；不過路邊社消息話，當年曹文錦都有開聲叫阿爺打救呢位世姪，唔知係咪咁，董伯伯見到曹Uncle特別熱情。