西九龍文娛藝術區就嚟落成，唔少高官都希望到時香港可以變成藝術之都，唔使再做文化沙漠。添馬艦新立法會大樓都想沾染啲藝術氣息，所以決定喺立法會內擺番啲藝術品襯托吓。噚日行政管理委員會嘅藝術小組傾過呢個問題，唔少人提議搞公開比賽，等市民設計啲特色藝術品放喺新大樓，亦有議員覺得搵專人設計好啲，稍後要再同政府傾吓邊個建議好啲。
不過，未放藝術品之前，有一樣嘢要先解決，就係加固地基問題。因為稍後擺放嘅藝術品可能好重好大件，如果地基唔實淨未必托得起，所以小組討論後決定預先做加固工程，仲議決由承建商包辦埋加固費用，冇理由再由政府額外揼錢。