英皇一姐容祖兒（Joey）在逆市下獲公司揼重本花數十萬拍攝新歌《搜神記》的MV，Joey更首次以30年代的懷舊美人look現身，極具韻味。現場安排了一名英日混血男模與Joey做對手戲，令Joey大感滿意，兩人在MV內也有不少身體接觸，不過Joey就坦言為怕豬流感，拒絕拍攝親嘴鏡頭。
容祖兒前晚在西貢成豐片廠拍攝新歌《搜神記》MV，穿上5吋高踭鞋的Joey以一身30年代懷舊美人look出現，配合化妝及髮型，韻味十足。首次扮演30年代女性的Joey對自己的新形象亦讚嘆不已，並笑言自己猶如芭比公仔一樣。現場佈置成一個昔日的舊車站，更有十多個古董皮篋及一架古董英國的士配合拍攝，場面華麗。
大讚對手靚仔
今次Joey獲公司厚待，在逆市之下花費數十萬來拍攝MV，令Joey也有意外驚喜，她說：「今次真係好開心，平時我拍MV都好causal，今次就好有電影感覺，自己初頭諗住公司會節省開支，但公司對呢首歌就好有信心。」
為了更具電影感，現場安排了一名高大有型的英日混血男模同她一起拍攝，該名男模在現場和Joey影合照時也甚為主動，甫出現即一手攬住Joey的纖腰，更不時主動黐近Joey，不過Joey就毫不介意，還大讚對手很靚仔，並笑言自己是老薑絕對不嘢小。
Joey透露原本公司計劃到台灣拍攝MV，但最後為了成本而取消，至於會否因為豬流感而拒絕與男模親熱，她說：「都會有，至多輕輕哋錫面，唔會錫嘴，唔會叫佢事前清潔，睇佢個樣都幾乾淨，唔去台灣唔關豬流感事，主要係因為香港都拍到，所以先留喺香港拍。」
盼與阿嬌合作
此外，早前國家廣播電影電視總局（廣電總局）發出禁播令，嚴禁邀請有劣迹的藝人做節目嘉賓，有指今次導火線是針對淫照女主角鍾欣桐（阿嬌），對此Joey就力撐阿嬌說：「作為阿嬌朋友會一直鼓勵佢努力，用佢最努力嘅誠意做好自己工作，相信有乜困難佢可以堅強面對。」而Joey亦大讚早前在《志雲飯局》舞台版中開腔唱歌的阿嬌表現不錯，只是情緒有少少激動，她又謂：「佢心情調整緊，我仲有叫佢練番一個佢已經掉低咗一排嘅樂器，等遲啲一齊合作演出，佢拉我唱囉。」
採訪：駱華齡
攝影：林德雄
