立法會經濟發展同環境事務委員會30幾個成員呢個月15號啟程北上，由主席曾鈺成帶隊下考察深圳、廣州同珠海。立法會秘書處計過度過，估計呢次四日三夜嘅珠三角之旅，每位大約盛惠6,500蚊。團費唔平，但議員唔使自己扲荷包，因為可以喺外訪津貼度扣，變相即係納稅人出。但無證嘅泛民議員就限制多多，絕對係「不自由行」。
要押後梁展文聆訊
有幸參加今次廣東團嘅無證議員只獲一次性簽注，除咗要喺公安選定嘅指定時間同口岸入境，更加唔准喺旅程中離隊，亦唔准遲到早退，入境後嘅行程就由廣東省港澳辦特別安排。八方睇過啲行程，發現景點一般，例如參觀南沙港、南沙濕地公園、廣州市垃圾焚燒發電廠以及夜遊珠江等，照計唔使咁貴。但呢筆費用包埋住宿同交通，唔知議員係咪被安排入住五星級酒店，所以旅費都幾揦脷。
雖然今次唔係全體議員訪問，但既然內地盛意拳拳，立法會都高度重視，所以連梁展文都要讓路，當日嘅梁展文第二度聆訊會順延舉行，方便專責委員會入面幾位成員順利隨團，可以一次過進行「規管」。
參加嘅委員喺15號當日開完內會，就要準時喺3點半喺立法會集合，一齊坐車出發，18號由珠海返香港。本來要喺當日內會後主持梁展文聆訊嘅李鳳英估計，至少有六個委員應該隨團，所以上星期內部開會時決定押後當日嘅聆訊，但唔擔心會影響進度，稍後為梁展文安排多次聆訊就搞掂。
何秀蘭係聆訊押後嘅受惠者，因為唔使佢取捨。無證嘅佢話一定隨團出發，因為自99年之後佢都冇踏足過內地，此行希望可以更深入了解內地。民主黨高達同樣唔使喺梁展文同廣東團中二揀一；雖然豬流感肆虐，但佢唔擔心去到珠三角會中招，因為佢哋去嘅地方人流唔多，需要時戴口罩搽消毒藥水就足夠。
但另一位無證人士涂謹申至今仍未決定，究竟跟立法會團去廣東，抑或去羅馬出席打擊洗黑錢問題嘅高峯會？所以佢呢兩日會細心研究廣東行程，睇吓邊個旅程更實用。
mailto:[email protected]