董事禁售期風波落幕近3個月，但香港特許秘書公會（HKICS）噚日至發表同科大協辦嘅研究報告，「力證」03至08年間上市公司只有少數（約30%）董事，喺業績公佈前買賣股份，當中75%買貨、25%沽貨，雖則股價有波動，但大部份涉及市值10億以下嘅細價股。而董事沽完貨，股價喺派成績表後，多數跑贏大市2%㖭。
既然咁「公平公正」，難怪城中200名大孖沙當初咁㷫，要登報群起反對禁售期。之不過，03年起係港股大牛市，相信價值投資法，齋買唔沽好正常，有記者問呢項調查有冇統計董事每次買貨嘅金額，「一次買1億元同一次買1000萬好唔同」，但主責嘅科大財務學系主任陳家樂竟答：「冇計過，我哋只計買賣次數。」
秘書公會理事梁偉強承認，董事對股份資訊有優勢，呢個係客觀嘅事實，但佢堅持過度延長禁售期，唔係禁止濫用內幕消息嘅絕對答案，解決問題就要加強企業管治，但點加強佢冇講。明白晒，呢份報告嘅公信力，相信你都有答案。