港鐵噚日宣佈將副車務總監李殷泰調去大嶼山，負責昂坪360吊車，代替昂坪360董事總經理張少華。兩人之中，張少華處理吊車墮車廂善後立功，另一位就係長期唔睇好嘅前九鐵舊臣。
兩人工作對調
大家可能仲記得合併前嘅九鐵，06年發生兵變事件，關鍵人物係位列當時第二把交椅嘅運輸高級總監李殷泰，就係因為佢處理東鐵裂紋事件被外界批評，觸發九鐵管理層同主席田北辰決裂。兵變時李殷泰同其他四名總監級管理層，率領多名中層人員撐署理行政總裁黎文熹。最後兵變失敗，黎文熹主動辭職，保住包括李殷泰等24名下屬，先至擺平件事。跟住兩鐵合併，九鐵舊臣大部份雖然過渡去港鐵，但全部變相燉冬菇冇得翻身，李殷泰亦改任副車務總監。
張少華職級低過李殷泰一大截，吊車墮車廂事件時只屬經理級。做地鐵車輛經理嘅張少華，過去一直負責機電工程工作，佢臨危受命，出任360董事總經理，清除咗吊車安全問題嘅疑慮。最近張少華仲推出吊車水晶車廂，遊客都好受落，口碑唔錯。今次功成身退，港鐵宣佈將佢調返港鐵車務部，做車務營運總管，同李殷泰對調，雖然個名唔同，但實際上接手李殷泰喺港鐵原本嘅工作。