台灣富商郭台銘旗下富士康（2038）控告比亞迪（1211）盜取商業機密單官司，拖拖拉拉咗將近3年，本嚟冇乜聲氣，投資者亦都不以為然，點知比亞迪舊年9月獲股神畢菲特間中美能源垂青入股，跟手仲「自願」披露有比亞迪前員工涉嫌非法接受富士康賄賂，竊取公司保密文件，成件事即刻變得峯迴路轉，仲好睇過連續劇。
適逢股神投資旗艦巴郡近日喺美國開股東會，剛剛添咗位千金嘅郭台銘亦按捺唔住心中嘅一團火，日前接受台灣《經濟日報》訪問之際，借機「三問」股神，隔空單挑呢位老人家嘅投資決定，兼且係條條到肉。
轟入股比亞迪唔專業
郭台銘一問股神，乜唔係一直標榜只會投資有誠信、長期經營嘅公司，「為何投資偷竊富士康商業機密的比亞迪？」
二問股神敢唔敢，全日揸住比亞迪架F3DM電動雙模車返工兼放工呢？
三問豐田、通用等國際車廠投資油電混合車好耐先至有錢賺，股神係用乜嘢專業知識判斷比亞迪嘅潛力？
郭台銘仲話，如果股神唔答，明年肯定會買番一兩股巴郡股票，親身飛去美國向佢請教。家一股巴郡價值約70幾萬港紙，郭台銘不如索性加多幾百萬銀，競投股神慈善午餐，咁咪唔使等多一年反映意見囉，仲可以趁機主動介紹自己鴻海系內公司，畀股神知道天外有天嘛。
李華華
mailto:[email protected]