金融海嘯爆發以來，裁員新聞多籮籮，唔少大行員工呢刻最大願望，相信莫過於保住份工。不過魚唔過塘唔肥，好似喺投資界身經百戰嘅Sandra謝李婉雯，今個月會返新工，由法興過檔摩根士丹利投資管理（MSIM），做亞洲區銷售及市場部阿頭，證明時勢唔好，有實力都唔憂冇出路。
跟舊老細裴布雷
論經驗，Sandra喺投資界打滾16年，做過唔少大行，最初喺怡富（即係家摩根資產管理），又喺鄧普頓同滙豐投資身居要職，離開法興前係結構產品衍生工具部董事總經理。論實力，佢唔只揸住名牌史丹福大學工商管理碩士張「沙紙」，仲精通英、粵、普通話同法文多種語言，可謂周身刀，張張利。Sandra今次跟番之前喺怡富同滙豐嘅舊上司裴布雷（BlairPickerell），裴布雷舊年初由滙豐轉投大摩，出任MSIM亞洲區CEO。