曾經因為咬斷主人黃婆婆隻右手，差啲被人道毀滅嘅金毛尋回犬阿柑，由蓮花犬舍嘅資深馴狗師張松照照顧咗唔經唔覺已經一年半。張師傅話，家阿柑已經13歲，係一隻老狗，由於年紀大，所以唔能夠教佢做乜新動作，好似畀手或者jump呢啲簡單嘢都係細個學先學到，但阿柑已經改咗壞習慣，唔會隨便咬人。
俾人摸都唔發脾氣
張師傅話，金毛尋回犬一般都唔會亂咬人，唔知阿柑之前點解會有呢個壞習慣，起初連張師傅摸佢佢都想咬，但經過一年半嘅訓練，阿柑已經變得善良，可以俾人摸。除此之外，阿柑家嘅生活都幾逍遙，得閒喺犬舍游吓水、玩吓咁。
猶記得一年半前，阿柑咬主人嘅新聞見報之後，好多愛狗人士都有去探佢，但家件事丟淡咗，已經冇乜人再去探。張師傅話，阿柑嘅舊主人後來都冇嚟探阿柑喇，但有位攝影師李華源就有心，最近仲特登去犬舍幫阿柑拍寫真。八方睇見今日阿柑啲毛長番，好食好住，的確靚仔咗唔少。