越嚟越多投資銀行賓架運用人脈網絡優勢，轉行搞私募基金。滙豐前亞太投行阿頭宦國蒼，聯同前花旗企業及投行亞太區CEO麥睿彬（RobertMorse），同博智資本執行合夥人吳永煇，近日就宣佈成立新嘅金融服務機構──博智金控（Primus）。
宦國蒼曾搵袁天凡幫手
新公司主要領導層都係由博智資本化身組成，公司日後以亞洲區為基地，初期資本規模10億美金，聽講係嚟自單一投資者。
一般人可能對於上述人物組合唔係咁熟悉，但如果一提到電盈（008）私有化單世紀官司，就會勾起印象，事關代表電盈大股東盈科拓展嘅資深大律師余若海，反駁證監會指控盈拓副主席袁天凡，同富通保險區域總監林孝華講大話時，就曾經披露，話袁天凡曾經喺舊年12月上海一個婚禮上，遇到譯音「吳永煇」嘅男子同埋宦國蒼，後者表示有投資者對富通亞洲業務有興趣，希望袁天凡可以運用其個人網絡幫吓手。
哦，原來係咁！