淫照女主角之一鍾欣桐（阿嬌）復出已經有一段時間，近日頻頻出嚟表演，日前嘅「五一勞動節」阿嬌就飛咗去重慶演出仙女山音樂節，當日佢到咗重慶之後立即返咗酒店準備，到晚上11點幾先至喺音樂會上出現擔任壓軸嘉賓。
疑電視台禁播
當阿嬌現身時，有fans立即擁上台前想睇阿嬌，點知有幾位女fans一時唔小心跌倒，相繼變成泥人，情況混亂，不過無阻阿嬌喺台上演出。當阿嬌唱到最後一首歌《下一站天后》時，佢見到台下有fans喊晒咁同佢一齊和唱同揮手支持，搞到阿嬌都感動到眼濕濕，不過阿嬌只係表演咗唔夠20分鐘，之後佢匆匆離場。
一向好唱得嘅內地歌星韓紅，因為現場音響問題搞到佢把聲都打咗折扣，令到韓紅發火，認為自己對唔住觀眾。
近日國家廣播電影電視總局（廣電總局）出禁令唔准電台同電視台節目講藝人緋聞同秘史，又唔可以搵有醜聞嘅藝人亮相，可能因為咁，當晚阿嬌表演時，轉播嘅電視台即刻播廣告，直至佢唱完先播番現場情況，因此重慶fans睇電視係睇唔到阿嬌演出，睇嚟阿嬌想喺內地全面復出仍要花啲時間。