花旗國嘅職業籃球聯賽NBA，早排被體育分析員笑為NoBenjamins（指印有BenjaminFranklin圖像嘅100美元鈔票）Association，即係笑佢哋冇錢。冇錢原因係啲客流走，除因金融海嘯，仲因NBA早排爆黑哨醜聞。其實未爆前，已有唔少教練同資深球員，喺每場開賽前一睇邊個係球證，已能推斷自己隊波嘅勝算。
球場就有球證，社會就有法官。特區今時今日咁成功，絕對因我哋啲法官大公無私，判決穩定兼有理。不過聽我老竇講，原來以前殖民時代好黑暗，「功力高」嘅律師，「揀法官」嘅情況非常猖狂。
睇性格 避鋒頭
聽聞喺70年代，有位鄉紳急電律師話：「我個仔俾人拉咗，你要救佢呀！」原來鄉紳個仔「與未成年少女進行性行為」，呢啲告得都應人贓並獲，所以入罪率高，非常難打。鄉紳最後一句，個仔唔可以坐監！
律師開始做功課，一睇邊個法庭審，就同鄉紳講：「你個仔唔使坐。」點解？到開審日，律師去到嗰個新界區裁判司署，第一件事就搵負責法官審案排期嘅courtclerk傾偈，風花雪月一番，跟住同佢講：「今日兩個法官，不如排畀法官B審。」
clerk話：「法官A冇乜case喎，可以快啲審你又快啲走。不過你要B就B啦。」
原來兩個法官都係愛爾蘭人，離鄉別井，係因兩個都頂唔順當時非常保守嘅愛爾蘭天主教社會。點解要揀B審？原來法官A離開愛爾蘭嘅原因，係因為佢自己個女細細個俾人未婚搞大咗個肚，權威法官頂唔順啲指指點點至嚟香港。俾A審，一定重判。
回歸後 唔使諗
B呢？佢離開保守愛爾蘭係因為佢係gay。最後律師等咗成日，鄉紳個仔認罪，被判緩刑唔使坐。「功力高」嘅律師，貴就係貴呢度。
不過今時今日仲有冇呢隻歌仔唱？都共和國時代，梗冇啦！
孫柏文
http://phatdat.blogspot.com