喜歡看直播的感覺，同好多人買爆谷拖着愛侶入場到戲院一樣，滿有期待專注兩句鐘，總希望揀選的電影能夠值回票價；與睡醒翌日早上，在屋企㩒ondemand可快速重溫全場比賽，或者買隻DVD返屋企煲，截然不同。今屆歐聯4強戰又殺埋身，真正球迷豈能錯過！
車路士能作客全場頂住「星球球隊」巴塞隆拿不失球，軒帥再次顯示殿堂級的防守部署；有時睇波不一定要4:4好睇，若「阿叔」能現場評述，肯定是天作之合。到翌晚，近年罕見地看到阿仙奴被圍攻，輸得少但踢出劣作，作為擁躉心情當然不好受，碰巧那位espn的評述員，又由第一分鐘起照稿將大堆資料讀出，說到完場前，還說雲格在96年起開始執教阿仙奴……天啊！好彩下屆不用再睇該台播歐聯。
車仔磨利刀等劏巴塞
兩支倫敦球會車路士及阿仙奴今屆在聲勢上一直落後曼聯，車仔球迷相信較不習慣，但總好過鄰會熱刺又花近億英鎊；賭友當然一直盤算着入球大細，讓球盤過關，甚至病態到賭單雙，但不論勝負，誠心希望兩隊能在主場踢出截然不同的部署，畢竟次回合迎戰巴塞及曼聯已無得守。車仔在剛過去周末已重用安歷卡拍杜奧巴，準備磨利刀劏巴塞，阿仙奴讓艾迪巴約休息一場，但明晚拍檔會是誰？賓特拿或者將拿斯尼推前？不敢想像。
我同好多球迷一樣，只是不想又是英超隊內訌打決賽。
文：蘋果波神