打從劉華的《17歲》、港產片《17歲的夏天》、台灣的《17歲的天空》，統統都引證17歲代表年輕、青春，但今年17歲的o靚妹歌手G.E.M.（鄧紫棋）卻說話老積，兼擁有17歲不應有的豐滿身材。G.E.M.細訴：「細個經常激嬲媽咪，又唔肯認錯，家諗番都好抱歉，仲有中一嗰年連母親節都唔記得，求其買包媽咪麵當禮物……」今年，G.E.M.不會再請媽咪食麪吧？
記者：蘇麗珊
攝影：梁細權
服裝提供：bossini（23711633）
想媽咪送我……嘮叨
自從G.E.M.在去年各大音樂頒獎禮取得多個新人獎後，就奠定了她實力女新人的地位。「都是屋企人影響我鍾意音樂，媽咪同婆婆喺屋企唱歌同彈琴、公公吹Saxophone、舅父就拉小提琴，細細個就在音樂的環境下長大，所以我對音樂好敏感。」她在8歲的時候已經開始嘗試作曲填詞，11歲便參加不同的歌唱比賽，而且更獲獎無數，故於樂壇取得好成績都是家人所賜。然而，成功的代價就換來零家庭生活。「家放工返家，屋企人都瞓晒覺，有時媽咪會放低碗湯畀我叮熱飲，嗰一刻真係覺得好溫暖。」中學時的G.E.M.也如一般年輕人放學愛逛街睇戲唱K而不想早早回家，又嫌媽媽的話嘮嘈，「細個時想18歲就搬出嚟住，但今年8月我就18歲，卻想留喺屋企耐啲，家想聽吓媽咪哦我都難！」G.E.M.慨嘆。
今年我送……速遞不能說的禮物
沒日日夜夜的見面，G.E.M.的爸媽只能透過她的網誌、Forum來了解她的一舉一動。「佢哋上Forum都是用我的Account，每月轉密碼時佢哋又會問番我轉了甚麼，很搞笑！」這麼近那麼遠的相處方式可能就是現今年輕人跟家人相處的模式，「家一放假我都留喺屋企陪佢哋，有次媽咪去完旅行返嚟，好似小朋友好嗲咁話想見我。」那17年來的母親節又怎度過？「其實我是沒記性的人，記得中一那年，一起身爸爸就話落街飲茶慶祝母親節，我嗰時就求其買包媽咪麵當禮物，媽咪當時俾我激死！」之後數年她也想過補數送禮，但那些不是半途而廢的頸巾，就是夾錢買的風筒。「今年母親節正日我會在L.A.錄音，所以飛前會同妹妹一齊請媽咪食飯，我會買份禮物到正日時速遞給她。」那是甚麼？「是秘密。」
未曾卻最該送……對不起
訪問尾聲除要求G.E.M.畫下心意卡外，還要她說出一句一直想說而又不敢跟媽媽說的話。她想了想，說：「死！唔想媽咪睇到㖭……該是一句真心的『對唔住』，讀書時夜返家又講大話、做錯事唔認錯，經常激嬲媽咪，但卻從未真心說過對唔住，有的話都是敷衍的『對唔住囉！』。以前覺得屋企人對自己好是理所當然，但入行後見面機會少了，反而更珍惜彼此相處時間。」鄧Auntie，你看到這裏，會否感受到女兒真心的答案？
你，點過母親節？
5歲的Brie（右）：「我之前的母親節都有禮物畀媽咪，今年就已經畫咗幅畫送畀佢，希望媽咪會鍾意。」
今年首次以母親身份過母親節的Lily（右）：「家九個月大的囡囡只會講媽、媽的單字，所以我最想收到的禮物係佢同我講聲『媽媽，ILoveYou。』然後再錫我一啖。」
擁有2歲多兒子的Adi（左）：「如果佢一起身就主動走嚟錫我一啖已經係最好的母親節禮物，我今年最想一家人去間環境舒適的西餐廳食飯，而囝囝由頭到尾都好乖坐喺度咁就最好。」
