平機會主席鄧爾邦被審計署揭發濫用公帑，堪稱係臧明華時代旅發局大花筒嘅翻版。金融海嘯下仲洗腳唔抹腳，點會唔天怒人怨？立法會帳目委員會決定對平機會進行聆訊，聽日請咗鄧爾邦親自出席會議答辯。
呢件事林瑞麟都唔使旨意甩身，事關林公公負責監管平機會；搞出大頭佛，議員點會放過佢？所以林公公聽日都會同時上立法會受靶。
帳委會今次派出陳茂波負責lead住平機會聆訊範疇，波哥相信委員會盡量就住市民關注嘅問題要求鄧主席解釋。帳委會暫時冇要求其他平機會委員、即係包括波哥競選對手譚香文等人出席聆訊，否則呢兩位歡喜寃家就可以罕有地同一陣線喇。