童愛玲帶同兒子Kyle、琦琦及汪詩詩昨日現身銅鑼灣世貿的親子活動，三位靚媽咪對於豬流感確診都表示關注，童愛玲說：「不嬲都做足準備，平時都有用酒精紙巾，之前都要去相熟藥房先可以買到口罩，小朋友返學就會跟教育署指引。」
琦琦則說：「今次政府反應好快，自己都好長氣成日叫個女去洗手，個女都覺得我成日哦佢。我遲啲都會去四川賑災，由於飛機廁所係高危地方，我都唔會用。」甄子丹太太汪詩詩則透露：「由於自己唔識睇中文，好多新聞都係子丹話畀我聽，家都唔係好嚴重，遲啲去四川賑災時一定會戴口罩。」
此外，黃佩霞則現身荃灣出席親子活動時，十分關注一對子女的健康，她說：「家好注重佢哋嘅抵抗力，畀佢哋食多啲補充劑，維他命，食嘢少肉多菜。」她表示如無意外，更會7、8月期間到美國探親五星期。
採訪、攝影：顏英儀