金融海嘯後，差唔多每日都聽到有企業裁員，家吓見面問候語已經由「你好嗎？」變成「你公司好嗎？」華華前排碰見Andrew黃偉康，唔小心用咗朋友問候人嘅方法，點知Andrew話：「公司？轉咗囉喎！」原來佢轉咗去敦沛證券做MD總經理。
家陣咁嘅時勢仲轉到工？Andrew話：「其實我自己都有啲意外，今次機緣巧合，丁世民搵我，佢轉咗去敦沛期貨做行政總裁，希望有人負責證券部。敦沛希望多方面發展，打響品牌。對我嚟講，佢嘅發展路向、思維都比舊公司更加接近，所以就過檔。」
過檔敦沛希望坐耐啲
Andrew舊年8月先至由一中轉去灝天，做咗8、9個月，難怪連佢啲客都嫌佢轉工轉得急咗啲。不過佢話呢個係難得機會，希望今次坐耐啲，唔使再轉。之前Andrew喺灝天金融任研究部主管，今次俾人挖角升職，梗有人工加啦，可以講得上係海嘯奇葩。