因為發表奴才論兼踩國貨而激起全球華人公憤嘅成龍，龜縮咗一排之後，噚日終於喺香港公開場合現身，喺聲稱係全國首個慶祝國慶60周年嘅活動上，由4點開騷留足兩粒鐘，臨尾仲唱埋首歌名相當符合佢死撐精神嘅《相信自己》至走。不過，相對佢早前喺博鰲嘅氣燄，噚日成龍明顯收斂咗好多，仲叫大家要包容、要和諧，動L不再，投晒降咁滯。
大會搵定新人做大使
呢個名為「香港各界青少年慶祝建國60周年」嘅活動，係由曾憲梓二仔曾智雄揸旗，港澳辦、中聯辦支持。一開場，成龍揸住支國旗出嚟，但明顯笑容拘謹，冇厘神氣，謝咗唔少。大會安排成龍獻唱咗首《國家》，首歌嘅填詞人王平久仲話，最鍾意係「有了強的國，才有富的家」呢兩句，話香港回歸之後到今時今日嘅發展，好證明到呢點，似乎係暗寸老董同煲呔向阿爺伸手攞嘢，香港先有今日。主辦單位仲話，成龍十一國慶典禮當日會再唱多鑊。
推銷開霸王洗髮水同日本電視機嘅成龍向來淨係識硬銷，噚日佢不只猛sell佢首《國家》，仲話呢首歌嘅意思係叫大家「要包容、要和諧」，仲越吹越勁，話只要每個國家都和諧，「我們就有一個和諧太平嘅地球」，咁都得？但成龍喺台上唱完一輪「我愛我的國，我愛我的家」後，現場三千幾個觀眾都唔知成龍所指嘅家係指邊頭住家。
大會亦唔知攞景定贈興，突然叫成龍主持個儀式，將一面寫上「國家宣傳大使」嘅錦旗，「薪火相傳」咁頒畀一班「新七小福」，仲話象徵將成龍對國家嘅思想承傳落去。至於「新七小福」會唔會好似成龍咁，驚中國電視爆炸或者覺得中國人需要管，大會就冇講到。
早排風頭火勢，成龍演出嘅政府宣傳片《真功夫》暫停喺電視播出。今日大會搵定班「新七小福」嚟接成龍「國家宣傳大使」嘅棒，咁會唔會又意味住遲啲連國慶主題曲佢都冇份唱呢？主辦單位噚日答得好玄，話「新七小福」純粹係幫輕吓成龍啫。
mailto:[email protected]