巴塞隆拿喺西班牙國家打吡作客6:2大炒皇家馬德里，今季已湊夠100個聯賽入球！佢哋賽後喺官網度講：「呢啲咪叫足球囉！」我求大俠覺得呢句並唔係寸皇馬，而係寸緊車路士早前喺歐聯4強點樣死守。呢支「百球大軍」，周三就會化身成龍捲風直搗史丹福橋踢次回合；周董歌仔都有得唱，睇怕車仔肯定「離不開暴風圈來不及逃」喇！
作客6:2狂數皇馬
我求大俠玩CM足球經理人遊戲就玩得多，以為喺聯賽入100球打機先會有，點知現實版真係有隊巴塞做得出！皇馬有希古恩先開紀錄又點啫，巴塞之後由亨利同美斯梅開二度，加埋佩奧爾、碧基各入一粒，喺巴拿比奴6:2大勝皇馬，絕對係近年最懸殊嘅國家打吡。同時，巴塞只需要34周，聯賽總入球已達到100球，而「三叉戟」更包辦69球，真係射你射到嚇死你呀！
美斯今季喺所有賽事入面，已經入咗36球兼交出16個助攻，同曼聯上季入咗42球嘅世足先生基斯坦奴朗拿度相比，仲差少少就破到。美斯仔仲好有愛心㖭，上個月佢先探望完班患有X染色體脆弱症嘅兒童，今場佢入完波後拎高件波衫，show咗件印有「SINDROMEXFRAGIL」嘅汗衫，以示將入球獻畀班細路，夠晒偉大！
魯爾輸到心服口服
賽後巴塞教頭哥迪奧拿就話：「我哋已邁進一大步，家陣好近冠軍喇！」嗰邊皇馬隊長魯爾眼見巴塞嘅表現，都忍唔住話：「唉，心服口服咯！」家巴塞34戰85分，領前皇馬經已7分咁多，難怪足智彩開出佢哋奪標賠率熱至1.001倍。仲有呀，巴塞仲破埋皇馬賽前保持嘅17勝1和不敗紀錄㖭，仲唔係好似打機一樣？
嚟緊周三巴塞就要作客車路士，上演歐聯4強次回合，上次主場俾車仔死守0:0，今次巴塞啱啱完成100球任務出征史丹福橋球場，車仔領隊軒迪克今次有難喇，我求大俠就睇呢位車仔領隊仲有咩「符弗」！
巴塞100球里程
球數：100
日期：02/05/09 賽果：客勝皇家馬德里6:2=
入球者：碧基 意義：100球大使
球數：71
日期：21/02/09 賽果：主負愛斯賓奴1:2
入球者：耶耶托尼 意義：打吡破蛋
球數：50
日期：03/01/09 賽果：主勝馬略卡3:1
入球者：恩尼斯達 意義：一半里程
球數：46
日期：13/12/08 賽果：主勝皇家馬德里2:0
入球者：美斯 意義：埋齋破宿敵
球數：44
日期：06/12/08 賽果：主勝華倫西亞4:0
入球者：亨利 意義：個人連中三元
球數：23
日期：25/10/08 賽果：主勝艾美利亞5:0
入球者：伊度奧 意義：個人連中三元
球數：1
日期：13/09/08 賽果：主和桑坦德1:1
入球者：美斯 意義：巴塞聯賽首球
資料來源：足智彩