聲言要建設第二支治港隊伍嘅中聯辦，唔止人才濟濟，仲財雄勢大，保釣行動委員會踢爆中聯辦官員使橫手，勸喻佢哋唔好貿然出海直闖釣魚台。正所謂無事不登三寶殿，雞髀打人牙骱軟，八方聽聞中聯辦設下嘅「鴻門宴」都幾豪氣，相約保釣勇士喺五星級酒店文華東方食早餐。
古有杯酒釋兵權，可能國家幹部唔方便摸住酒杯底談保釣大事，所以改為飲橙汁、食多士，幸而保釣勇士都係熱血男兒，冇咁易俾中聯辦搞掂。據講呢次早餐會氣氛甚差，雙方不歡而散，軟功不受，難怪中聯辦要使硬功。
保釣行動委員會今次出海，背後原來幾多猛人力撐，八方知道民建聯創黨主席、立法會主席曾鈺成，同埋行會成員張炳良都有捐錢，各資助一萬元。
有人指佢哋兩人出錢別有意義，一來象徵不同黨派都支持保釣，二來有行會、立會都撐保釣意味，唔係民間行動咁簡單也。