上期筆者話大市非牛非熊，鬼鬼祟祟，港股在圖表上16000阻力未能突破，所以暫時不要沾手大價股，反而炒中小型股隻，再加上期指淡倉對冲，似乎更為上算，當時大市看似對壞消息免疫，不料突然殺出豬流感，令期指急跌至14400水平，期指淡倉先吃一注，但周四執筆之時，大市又突然急升，唔通大市真係咁勁？
筆者日前在友報指出，期指早前跌穿恐慌底14794水平，下跌之勢已初步形成，所以應該吼位造淡，雖然大市近兩日跌完又回升，但美國剛剛公佈的GDP數字大跌6.1%，壓力測試又會在假期後出籠，已知有幾間銀行唔多掂，而且美國汽車廠隨時關門大吉，再加上豬流感，照道理股市不會毫無反應，所以即使大市反彈，筆者依然繼續持有手上淡倉。
期指升穿15981才脫險
當然，如果大市真係唔理壞消息，又突破圖表上的阻力，還是不能太硬頸，例如期指升穿15981，淡倉就要投降，因為4月結算之後，筆者早前所講月線兩連陽的高位便是15981，加上以往熊市上試高位阻力區後例必回調，所以在一堆壞消息之下仍能升穿15981，大市升勢實在非同小可，就算不是牛市，亦應繼續彈，所以筆者會盯着這位置。
然則，期指現處中間位15400，有咩好做？既然知道關鍵位15981，一日未穿，大市一日都未脫離危險，筆者視在15981前的反彈為分段部署淡倉的機會，可嘗試運用黃金比率加注，例如由15981跌至14436，共1545點，反彈0.618倍，即15390左右，期指周四雖然升至15442，但收市卻回跌至15389，顯示黃金比率有一定指標性，筆者經常話熊市宜吼反彈沽，讀者可考慮運用此法。
當然，沽空造淡未必合符每個人嘅口味，筆者亦覺得底部已見，但見底與大升不是同一回事，買股不買市，應該是未來一段時間的策略，現時大市位處高位，買股長揸略嫌超買，短炒則無妨，例如上期筆者話中央如果拒絕下調存款準備金率，即是支持銀行放貸之說只係空口講白話，難以看好，上周便傳出中央可能下調準備金率，若真係有政策配合又唔同講法，所以即時刺激一眾內銀及內房股急升，其中筆者對瑞房（272）尤其鍾愛，正好乘這個消息又炒一轉。當然，消息股只係短炒，若真係要落大注，不妨等中央真的下調存款準備金率，以實質行動支持銀行救市時也不遲。
張士佳