鄭大班喺now主持節目只係兼職食散餐，佢同其他富豪合資開辦嘅雄濤電台先係正餐，由於興建發射站受阻，大班電台開咪無期，令佢頗為閉翳，但近日可能有突破性進展。八方聽聞新電台可能放棄興建發射站，直接採用數碼廣播，如果一切順利，最快半年後可以試播。
如果落實試播，據八方了解，初時會以音樂及軟性清談節目為主，時事、新聞節目正式開台時先出街。大班接受查詢時稱，幾時試播要視乎技術問題能否解決，但明年4月開台目標不變，佢又話仍在努力解決興建發射站問題，如果其他三個電台願意配合，會易辦事得多，佢又承認正積極考慮數碼廣播可行性。
大班另一件考慮中嘅事係新電台名稱，應該唔會叫雄濤，至於佢已註冊嘅「數碼電台」亦似乎唔啱心水，因為佢最想係為人民服務。