人類豬流感殺入香港，政府高度戒備，為免重蹈沙士時醫管局高層何兆煒都中招嘅覆轍，所有要涉足高危地方嘅官員，都打醒十二分精神做足保護措施。原來，坐喺立法會開會嘅議員都不敢掉以輕心，噚日開特別會議討論豬流感時，患流感嘅醫學界議員梁家騮好識做，揀咗個最前排位置坐，話咁就唔怕飛沫噴人。
消毒藥水掛頸開會
公民黨余大狀嘅老公都係醫生，所以佢都早有準備，掛住支消毒藥水喺頸度開會。余大狀話，病毒無處不在，香港又有確診個案，所以隨身帶備消毒藥水噴吓雙手，咁先至安心；佢又擔心醫護人員消毒、防疫用品不足，要求醫管局交代有冇足夠保護用品畀員工。醫管局行政總裁蘇利民拍心口話有足夠消毒用品，員工可隨便取用，又話支持員工學余大狀咁隨身帶備消毒藥水，大讚余大狀係防疫好例子，「簡直係人辦！」
沙士時董太A1全副裝備去牛下做騷，成為抗疫代表人物；咁啱余大狀洋名Audrey，民望又第一，今次大可取而代之成為09年A1抗疫icon，由佢出面叫市民洗手、洗手、洗手，冇話唔得，唔知官府會唔會考慮，定係留番畀特首夫人曾太領軍？
白鴿黨涂謹申透露，有熱心人擔心獨居長者乏人關顧，冇錢買口罩等防疫用品，一旦豬流感社區爆發就好易中招，所以呢位熱心人想捐出兩萬蚊，希望透過佢代交相關機構購買防疫物資送予獨居長者。食衞局局長周一嶽話會留意情況，政府暫時唔使籌錢抗疫；衞生署署長林秉恩則話物資夠，但人手緊張，衞生防護中心人員近日空群而出，「人人做到天光，冇乜瞓覺。」如果要打持久戰就弊。
民記補選前派口罩
講到抗疫，民建聯噚日率先上街派口罩，主席譚耀宗去到灣仔鵝頸橋免費派口罩畀街坊。民記經常益街坊，派口罩有乜咁特別？特別在呢個區將補選區議員，民建聯鍾嘉敏近日不斷在區內辦義診同免費法律諮詢，擺明有意思參選，送口罩目的何在唔使多講。家口罩賣斷市，炒到幾蚊一個都有價有市，民記咁大手筆，八方唔知道有冇違規，有意參選嘅季詩傑、鄺家賢又點睇？
mailto:[email protected]