今期由畢傑同大家玩吓波膽互串，德甲有場幾好路捉，漢堡雖然啱啱打完歐協盃4強首回合，不過目前仲有機會爭聯賽冠軍，周日主場對住哈化柏林，點秤實力同人腳都勁過對手。
睇番兩軍對賽往績好鬼旺2:1波膽，即係贏波嗰隊通常都以呢個比數勝出；好似漢堡近6次主場對哈化，成績係5勝1和，當中4場勝仗全部係贏2:1。就算首循環哈化都係主場贏漢堡2:1，大旺總入球「3球」，波友信邪嘅不妨吼實，我就揀硬漢堡勝2:1呢個8.5倍波膽。
同意甲名家石兄成日傾開，卡坦尼亞呢隊波主場硬淨過乜，今場16場贏過10場就知猛料，連羅馬、拉素同熱拿亞都要喺度全失3分。今晚卡坦尼亞對住AC米蘭，我就批佢哋輸唔到，一於同石兄同路。信往績不妨留意埋1:1波膽，事關意甲及意盃在內，卡坦尼亞近6次迎戰AC全部和波收場，佔5次開足1:1波膽，證明AC近年到訪馬森文奴球場都冇啖好食，今場當然要再追，賠率正路有6.5倍。
紅軍炒紐記4蛋好分
最後一關玩埋英超，要利物浦主場大炒紐卡素，應該未至於開到「主其他」，不過4:0（11倍）相信冇走雞。至於西甲嗰邊我推介愛奴2:2和華倫，但本欄話明扒冷，補多個更好分嘅50倍3:3。文：畢傑