香港前日確診首宗豬流感(甲型流感H1N1),源頭來自一名經由上海來港的墨西哥男子,曾與他接觸的人士均有危險,令港人更加重視防疫工作。昨日一眾娛樂圈中人也加入搶購消毒用品行列,黎耀祥一家三口和o靚模周秀娜分別出動買口罩,而林文龍和郭可盈則斥無良藥房坐地起價。
豬流感襲港,黎耀祥昨日趁假期與太太Julia及兒子到尖沙嘴飲茶行街敍天倫之餘,不忘到藥房購買預防豬流感用品。昨日下午1時許,祥仔一家三口現身美麗華商場附近一間藥房,現場見祥仔選購了一盒50個裝、價值50元的口罩和一大支價值約20元的消毒水,待太太付款後,祥仔便將口罩和藥水放入自己的袋中,未有索取膠袋,十分環保。
祥仔愛兒取消美國行
記者其後致電祥仔時,他說:「經過沙士之後,大家都提高警覺,所以我都買定啲口罩同消毒藥水,尤其係屋企有小朋友㖭。另外,我哋都會盡量小心啲,少去人多嘅地方,原本暑假我個仔同外父外母去美國玩,但家咁嘅環境,決定取消行程,無謂犯險吖!」
o靚模周秀娜昨日也特意在工作前先搶購口罩以防萬一,昨日下午她要到屯門為農夫簽唱會擔任嘉賓,活動舉行前她先到藥房搜購口罩和消毒濕紙巾,其間有不少途人認出周秀娜,但她卻無懼途人眼光加入搶購戰團,最後買得3盒口罩及數包消毒濕紙巾,付款後更見她即時戴上口罩。
事後周秀娜接受電話訪問時,坦言得知豬流感襲港後大感恐怖,她說:「真係好驚,因為可以人傳人,而且好似傳得好快,所以今日就趁工作前買定口罩同消毒用品,我仲有打電話畀媽咪叫佢小心啲,我都買埋口罩畀佢。自己最重要係注意個人衞生,家我勤洗手,出街就唔好隨便掂扶手。」會否因豬流感而減少與男友親嘴?她笑言自己與男友均十分注意衞生,故不怕互相感染。
周秀娜昨日與「味之天使」的「菠蘿」郭穎橋到屯門市廣場,為農夫的潮傘簽唱會擔任嘉賓,自爆患感冒的郭穎橋卻未有戴口罩。而大會則在現場安排了消毒酒精液,要求排隊取簽名的fans先行清潔雙手,農夫接受訪問時也謂禁止與歌迷握手,他們說:「我哋呢把遮就係寓意落雨不怕,落雪也不怕,就連豬流感都唔怕,我哋就冇戴口罩,除非去醫院啦。」問到二人是否關心身在美國疫症重災區的老闆陳冠希(Edison)時,他們稱不知Edison現時身在何處,而且很久沒聯絡,但透露稍後會為新碟事宜與Edison會面。
可盈斥藥房坐地起價
此外,林文龍和郭可盈夫婦昨日也專程到西貢一藥房購買防疫用品,自確診首宗豬流感消息傳出後,部份藥房將口罩及消毒用品坐地起價,他們齊聲斥無良奸商說:「呢個做法好差勁,唔應該發呢啲財,家大家同坐一條船,要共同進退。」提到政府隔離患者曾入住的酒店惹來不少異議,林文龍說:「唔好喺雞蛋裏邊挑骨頭,寧願做多好過做少,做少咗出現問題,只會俾人圍攻,反而做多咗冇事,大家都得個安心,就算整體經濟出現問題,我覺得冇所謂,經濟一定有起有跌,最多辛苦啲,大家一齊共度呢個難關,過咗呢一關,又有好嘅未來。」
郭可盈則認為港人不必太恐慌,雖然她與林文龍經常都要出入公眾場所及到外地工作,但她表示目前的工作暫時未有影響,故不用太擔心。
採訪:駱華齡、何慧斯、陳寶明
攝影:陳俊強、娛樂突發組
全城防疫:小心為上口罩黨
香港證實第一宗豬流感確診個案,昨日一眾藝人現身公眾場合紛紛戴上口罩,例如蔡卓妍、容祖兒及薛凱琪等,前日在北京出席音樂會後,昨日返港時均在飛機上全程罩不離口。
容祖兒:勤啲洗手
「我做足防備㗎啦,自己小心啲,大家唔使太擔心,及早發現就可以防止疫症蔓延。我都有啲03年時買落嘅口罩,不過媽咪都會再買,自己會勤啲洗手,同埋都要注意鞋嘅清潔。」
蔡卓妍:買定口罩
「我知道香港有一宗確診個案,因為我表弟係做醫生嘅,佢都有SMS叫我小心啲,至於我媽咪就好擔心,已經買定晒口罩。自己都會有啲擔心,成日都要去多人嘅地方,喺飛機上我都全程戴住口罩,而且有帶消毒用品,食嘢前都會洗手。不過內地未有公佈,都未見有人戴口罩。」
Kama:媽咪擔心
「我去蘇梅做嘢,已經帶定50個口罩去,我頭先喺車上聽到荃灣有14單懷疑個案都好驚,媽咪都擔心㗎,成日問我幾時返。我喺機上一定罩不離口,因為機上都容易感染,所以一定會全程戴住,自己會多啲洗手同埋勤換口罩。」
薛凱琪:手套傍身
「我知道有確診個案呀,我去北京時都有戴口罩,不過有時太焗都會除咗。上機前我已經買晒消毒紙巾,同埋唱歌前將個咪消毒,少啲去人多嘅地方。我喺北京睇電視,睇到墨西哥政府叫人唔好出街,其實越早預防越好,我仲有帶定手套同消毒gel。」
鄭希怡:盡量小心
「我自己會盡量小心啲,勤啲洗手,同埋戴口罩。嚟緊我都有啲工作要返內地做,咁嚟緊出trip都一定會帶定口罩同消毒用品。同埋如果發現唔舒服就要快啲去睇醫生,出街一定要戴口罩保護番其他人,呢樣係基本衞生常識,大家都要留意。」
何韻詩:自助助人
「我之前一晚都同fans聚會,都有好多人,因為我有少少喉嚨痛同好攰,為免被隔離都要小心啲,保護自己都要保護別人。其實自從SARS之後,助手同TVB都有消毒用品提供,用咪之前都會抹一抹。」