樂壇天后瑪麗嘉兒（MariahCarey）噚日喺拉斯維加斯同NickCannon慶祝結婚一周年，佢獲老公送上一段精心炮製嘅深情短片，紀錄二人一年嚟嘅溫馨時刻，瑪麗睇到喜極而泣，場面感人。
切四層蛋糕慶祝
噚日Nick去到賭城MoonNightclub做DJ，穿着性感嘅瑪麗做跟得夫人。當派對進入高潮時，Nick向賓客表示有特別事宣佈，原來佢準備咗一段短片紀念同瑪麗結婚一周年，仲公開大讚老婆話︰「佢係世界上最奇妙嘅人，我將自己嘅生命獻畀佢，我哋永遠喺埋一起，佢係我嘅基石。」瑪麗即時被感動到流淚。之後場內降下咗1,000個氣球，瑪麗夫婦仲切四層蛋糕慶祝，羨煞旁人。